Stjórn Menningarráðs Vestfjarða vinnur nú við að fara yfir og afgreiða styrkumsóknir sem bárust vegna seinni úthlutunar ráðsins á árinu 2009. Alls bárust 89 umsóknir um styrki að þessu sinni, jafn margar og við fyrri úthlutun ársins í vor. Beðið er um framlög að upphæð tæplega 75 milljónir til fjölbreyttra menningarverkefna, en heildarsamtala í fjárhagsáætlunum verkefnanna hljóðar upp á 436 milljónir. Það er því ljóst að það er mikill hugur í Vestfirðingum á menningarsviðinu og mörg verkefnin býsna viðamikil, þó auðvitað séu þau af öllum stærðum og gerðum. Til ráðstöfunar er 18,5 milljónir að þessu sinni.  

Úthlutun vilyrða fyrir styrkjum fer fram nálægt næstu mánaðarmótum, en þeir eru síðan að venju greiddir út í samræmi við framvindu verkefna. Menningarráð Vestfjarða styrkir aldrei verkefni um meira en 50% af fjárhagsáætlun eða kostnaðaryfirliti að verki loknu, þannig að áhrifin af styrkjunum eiga að vera mun meiri en upphæð þeirra segir til um. Frá upphafi hefur Menningarráðið lagt sérstaka áherslu á að stuðla að nýsköpun, gæðaþróun, samvinnu og fjölgun skapandi starfa í menningargeiranum á Vestfjörðum. Formaður Menningarráðs Vestfjarða er nú Leifur Ragnar Jónsson á Patrekfirði, en Gerður Eðvarsdóttir á Ísafirði er varaformaður.

Styrkúthlutun í Edinborgarhúsinu á Ísafirði í vor - ljósm. Ágúst Atlason

Háskólasetur Vestfjarða vinnur nú að úttekt á starfsemi Menningarráðs Vestfjarða og árangri sem styrkir þess hafa haft. Liður í þessari úttekt er almenn viðhorfskönnun á vefnum, en hún er bæði ætluð þeim sem koma beint að menningarmálum á Vestfjörðum og öðrum sem hafa áhuga á vestfirskum menningarmálum.

Könnunin er aðgengileg fram á miðnætti sunnudaginn 15. nóvember og er aðgengileg undir þessum tengli: http://www.hsvest.is/konnun_menningarrad/. Menningarráð hvetur fólk til að taka þátt og koma á framfæri viðhorfum sínum og skoðunum.