Aðalfundur Menningarráðs Vestfjarða er haldinn föstudaginn 2. september 2011, í tengslum við Fjórðungsþing Vestfirðinga. Fundurinn verður haldinn í Félagsheimilinu í Bolungarvík og hefst kl. 17:15 eða eftir að störfum Fjórðungsþings er lokið á föstudegi.

Samkvæmt samþykktum Menningarráðs Vestfjarða velja sveitarstjórnir á starfssvæðinu fulltrúa sína á aðalfund Menningarráðsins og fara þeir með umboð viðkomandi sveitarstjórnar í samræmi við íbúafjölda viðkomandi sveitarfélags þann 1. desember árið áður. Aðalfund situr einnig stjórn Menningarráðsins hverju sinni og menningarfulltrúi. 
 

Á aðalfundi skal samkvæmt samþykktum ráðsins taka fyrir eftirfarandi mál:

# Skýrsla stjórnar um starfsemi ráðsins á liðnu starfsári.

# Ársreikningur ráðsins fyrir liðið ár lagður fram ásamt athugasemdum endurskoðenda ef einhverjar eru.

# Kosnir tveir skoðunarmenn reikninga. Skoðunarmenn má ekki kjósa úr hópi stjórnarmanna eða starfsmanna ráðsins.

# Ráðsstjórn leggur fram tillögur að fjárhagsáætlun næsta árs og breytingar á framlögum skv. samningi við ríkið.

# Ákvörðun um þóknun til stjórnarmanna.

# Önnur mál.

Ekki hafa komið fram tillögur að breytingum á samþykktum Menningarráðsins og fulltrúar í Menningarráð voru kjörnir til tveggja ára á síðasta aðalfundi.

Menningarfulltrúi Vestfjarða, Jón Jónsson, hefur verið í sumarfríi síðustu vikur. Hann er nú snúinn aftur til starfa á skrifstofunni, síminn er 891-7372 og netfangið menning@vestfirdir.is og notar fyrstu vinnudagana til að yfirfara póst og tölvupóst sem borist hefur í sumar og bíður afgreiðslu. 

Síðari styrkúthlutun ársins 2011 er framundan og má reikna með að auglýst verði eftir styrkjum í september, í framhaldi af aðalfundi Menningarráðsins sem haldinn verður í Bolungarvík 2. september.  

Frá afhendingu styrkja í Melrakkasetri Íslands í Súðavík í desember síðastliðnum - ljósm. Brian Berg

Stjórn Menningarráðs Vestfjarða hefur lokið vinnu við að fara yfir styrkumsóknir vegna fyrri úthlutunar ráðsins árið 2011 og ákvörðun hennar um framlög til einstakra menningarverkefna liggur fyrir. Samtals bárust 97 umsóknir um stuðning við verkefni að þessu sinni og var úr vöndu að ráða því bæði voru umsóknir óvenju margar og vandaðar. Fjölmörg verkefni voru einnig mjög áhugaverð og verður spennandi að fylgjast með þeim sem verða að veruleika.

Samtals var sótt um rúmlega 75,6 milljónir, en samanlögð kostnaðaráætlun verkefna er tæpar 382 milljónir. Hefði stjórn Menningarráðsins gjarnan viljað hafa meira fjármagn til ráðstöfunar að þessu sinni, bæði til að styrkja fleiri góð verkefni og einnig til að upphæðir til einstakra verkefna gætu verið hærri. Menningarráð Vestfjarða samþykkti að veita styrki til 34 verkefna við fyrri úthlutun 2011, samtals að upphæð 14.650.000.-

Í stjórn Menningarráðsins við vinnuna að úthlutunarferlinu sátu Leifur Ragnar Jónsson formaður, Gerður Eðvarsdóttir varaformaður, Jóna Benediktsdóttir, Katrín Gunnarsdóttir og Ásta Sjöfn Kristjánsdóttir.

Sú breyting er gerð á framkvæmd úthlutunar að þessu sinni að niðurstaða Menningarráðsins er kynnt með fréttatilkynningu, en ekki verður um sérstaka úthlutunarathöfn að ræða eins og verið hefur undanfarin ár. Er það gert í sparnaðarskyni. Að venju eru ekki gefnar upplýsingar um þau verkefni sem fá ekki styrk. Menningarráðið þakkar kærlega fyrir allar þær umsóknir sem bárust og óskar umsækjendum velfarnaðar í verkefnum sínum. Aftur verður auglýst eftir umsóknum um styrki í haust.

Framlög Menningarráðs Vestfjarða til verkefna við fyrri úthlutun ársins 2011 (umsækjendur í svigum):

Staparnir - ljósa- og ljóðlistaverk (Haukur Már Sigurðarson) - 1.000.000.-
Aldrei fór ég suður - tónlistarhátíð (Aldrei fór ég suður, félag) - 1.000.000.-
Leiklistarnámskeið og götuleikhús (Vesturbyggð og Tálknafjarðarhreppur) - 800.000.-
Útgáfa á kynningarblaðinu Vestfirsk menning (Félag vestfirskra listamanna) - 750.000.-
Tónlistarhátíðin Við Djúpið 2011 (Við Djúpið félag) - 750.000.-
Act Alone 2011 (Act Alone) - 750.000.-
Skjaldborg  2011 (Skjaldborg - hátíð íslenskra heimildamynda) - 750.000.-
Viðburðir í Menningarmiðstöðinni Edinborg (Menningarmiðstöðin Edinborg) - 700.000.-
Dellusafnið (Jón Svanberg Hjartarson) - 500.000.-
Roð og rekaviður (Listaskóli Rögnvaldar Ólafssonar) - 500.000.-
Minningar (Þjóðfræðistofa) - 500.000.-
Fransmenn á Vestfjörðum (Minjasafn Egils Óafssonar á Hnjóti) - 400.000.-
Báta- og hlunnindanytjar (Æðarvé) - 400.000.-
Ópera Vestfjarða - stofn- og undirbúningsstyrkur, námskeið og tónleikar (Ópera Vestfjarða) - 400.000.-
Jón Sigurðsson - leiksýning (Kómedíuleikhúsið) - 400.000.-
Vestfirskir listamenn & lífskúnsterar (Ágúst G. Atlason) - 400.000.-
Find Ice (Listaskóli Rögnvaldar Ólafssonar, dansdeild) - 400.000.-
Æringur - listahátíð í Bolungarvík (Kolbrún Ýr Einarsdóttir) - 400.000.-
Pönk á Patró 2011 (Jóhann Ágúst Jóhannsson) - 400.000.-
Heyrðu mig nú (Listavélin) - 400.000.-
Stækkun á sýningarými Skrímslaseturs (Félag áhugamanna um skrímslasetur) - 300.000.-
Every child has the right to laugh (Sarah Thomas) - 300.000.-
Hnífsdalur í 100 ár (Íbúasamtök Hnífsdals) - 250.000.-
Börn og myndlist (Listaskóli Rögnvaldar Ólafssonar) - 250.000.-
Mikki og melrakkarnir á fjalirnar (Melrakkasetur Íslands) - 250.000.-
Strengur / Hringfjórðungur (Jón Sigurpálsson) - 200.000.-
Einstök sýning - listamaðurinn með barnshjartað (Gíslastaðir) - 200.000.-
Leikferð um Vestfirði (Leikfélag Hólmavíkur) - 200.000.-
Skelin: menningardagskrá á Ströndum veturinn 2010-2011 (Þjóðfræðistofa) - 200.000.-
Menningarkort og söguferðir Ísafjarðardjúpi (Ögur ehf) - 200.000.-
Menning og saga Bíldudal (Birna Friðbjört Stephensen Hannesdóttir) - 200.000.-
Hemúll á heljarslóð (Arnar S. Jónsson) - 200.000.-
Listasmiðja í skrímslagerð I og II (Ása Dóra Finnbogadóttir) - 200.000.-
Ugla sat á kvisti (Þjóðfræðistofa) - 100.000.-
 

Frá úthlutun Menningarráðs haustið 2009 - ljósm. Ágúst Atlason

Góðir gestir munu mæta á Listamannaþing Vestfjarða á Ísafirði sem haldið er á morgun, laugardag. Það eru Goddur (Guðmundur Oddur Magnússon) prófessor við Listaháskóla Íslands og Hildur M. Jónsdóttir framkvæmdastjóri Brúðuheima í Borgarnesi. Goddur mun flytja hugvekju um listina og landsbyggðina, en Hildur segir frá uppbyggingu Brúðuheima og tengd verkefni. Brúðuheimar hafa vakið mikla athygli fyrir það hversu vönduð uppbyggingin er í alla staði og nú er nýlega lokið alþjóðlegri brúðulistahátíð í Borgarnesi.

Listamannaþingið verður haldið á morgun laugardag kl. 13-16 í Listakaupstað í Norðurtanga, 3. hæð, og er samvinnuverkefni Menningarráðs Vestfjarða og Listakaupstaðar. Þar er kallað saman listafólk í ólíkum listgreinum um alla Vestfirði til skrafs og ráðagerða á eins konar stefnumót. Fulltrúar listgreina miðla af reynslu sinni og spekúlera í framtíð listarinnar á Vestfjörðum og listahátíðir í fjórðungnum eru kynntar. Þá verður lögð fram tillaga um stofnun Félags vestfirskra listamanna á Listamannaþinginu og ef hún fær góðar undirtektir verður slíkt félag stofnað á staðnum og kosið í stjórn. Allir eru velkomnir á Listamannaþingið, en dagskráin fylgir hér að neðan:

Dagskrá Listamannaþings Vestfjarða

13:00 Ólíkar listgreinar á Vestfjörðum og framtíð þeirra
- Fulltrúar heimamanna tala um ólíkar listgeinar

13:35 Vestfirskar listahátíðir kynntar:
- Leiklistarhátíðin Act Alone
- Tónlistarhátíðin Við Djúpið
- Heimildamyndahátíðin Skjaldborg
- Rokkhátíð alþýðunnar, Aldrei fór ég suður!

14:05 Skoðunarferð um Listakaupstað á Ísafirði
- Menningarráð Vestfjarða býður upp á kaffi og bakkelsi á Listamannaþinginu.

14:20 Málstofa um menningartengda ferðaþjónustu
- Hildur Magnea Jónsdóttir, framkvæmdastjóri Brúðuheima í Borgarnesi
- Jón Jónsson, menningarfulltrúi Vestfjarða

15:00 Listin og landsbyggðin
- Guðmundur Oddur Magnússon (Goddur) flytur hugvekju

15:40 Stofnfundur félags vestfirskra listamanna
- Formlegur félagsskapur vestfirskra listamanna stofnaður á mettíma

Formlegri dagskrá líkur með gönguferð um menningarbæinn Ísafjörð, þar sem kíkt er við á nokkrum sýningarstöðum. Menningarlífið á Ísafirði er í blóma og mikið um að vera um helgina. Gestir á Listamannaþingi Vestfjarða eru hvattir til að staldra við á Ísafirði og njóta lífsins og listarinnar.

 

Menningarráð Vestfjarða auglýsir eftir umsóknum um styrki til menningarverkefna á grundvelli samnings mennta- og menningarmálaráðuneytis og iðnaðarráðuneytis við Fjórðungssamband Vestfirðinga. Tilgangur styrkjanna er að efla menningarstarfsemi og menningartengda ferðaþjónustu á Vestfjörðum.
 
Áherslur við fyrri úthlutun 2011
Hægt er að sækja um stuðning við hverskyns menningarverkefni, svo framarlega að umsókn eða verkefni stangist ekki á við úthlutunarreglur sem samþykktar eru við hverja úthlutun. Menningarráð Vestfjarða hefur ákveðið að við fyrri úthlutun ársins 2011 verði horft sérstaklega til verkefna sem uppfylla eitt eða fleiri eftirtalinna atriða: 

# Verkefni sem efla samstarf á sviði menningarmála á Vestfjörðum.

# Verkefni sem stuðla að nýsköpun og fjölbreytni í menningartengdum verkefnum.

# Verkefni sem fjölga atvinnutækifærum á sviði menningar.

# Menningarstarfsemi sem styður við ferðaþjónustu.

# Verkefni sem stuðla að þátttöku barna og unglinga í listsköpun og menningarstarfi.

  
Umsóknarfrestur er til og með fimmtudeginum 14. apríl. Úthlutun fer fram í maí. Fyrirvari er gerður um undirritun nýs menningarsamnings milli ríkisvaldins og Fjórðungssambands Vestfirðinga fyrir þann tíma.
 
Umsóknum skal skilað til Menningarráðs Vestfjarða á viðeigandi eyðublöðum eða í gegnum umsóknarform hér á vefnum undir tenglinum Styrkir. Umsækjendur eru eindregið hvattir til að kynna sér úthlutunarreglur Menningarráðs á sama stað.
 
Allar nánari upplýsingar veitir Jón Jónsson menningarfulltrúi Vestfjarða í síma 891-7372 eða í netfanginu menning@vestfirdir.is.