Ljósm. Sigurður Atlason

Strandagaldur hefur gefið út galdrabók sem heitir Tvær galdraskræður. Magnús Rafnsson sagnfræðingur á Bakka í Bjarnarfirði hefur tekið saman efnið í bókina og séð um útgáfuna. Bókin er bæði á íslensku og ensku þar sem íslenskan er prentuð á hægri síðu opnanna og ensk útgáfa á þeirri vinstri. Í bókinni Tvær galdraskræður eru prentaðar tvær skræður eftir handritum frá því um 1800, einni öld eftir að hætt var að sækja menn til saka fyrir galdra. Tvær galdraskræður er komin í sölu hjá Galdrasýningu á Ströndum og það er einnig hægt að panta hana í vefverslun sýningarinnar.

Fyrra handritið í bókinni, Lbs 2413 8vo, er talið frá því um 1800 og bók með jafn mörgum galdrastöfum er ekki sett saman fyrr en alþýðufræðimenn undir lok aldarinnar fara að safna saman efni úr fleiri en einu handriti. Ekki er vitað hvar handritið er skrifað og heldur ekki hvernig það barst á Landsbókasafnið.

Handritið er 10 x 8 cm og alls í henni 74 blöð. Í handritaskrá Landsbókasafnsins er handritið sagt skrifað af einni og sömu höndinni og kallað rúna- og galdrakver. Engin dæmi um venjulegar rúnir finnast þó í bókinni, en þó nokkrar ókennilegar stafarunur. Bókin hefst á safni þjófagaldra og ástargaldra, en eftir það er engin sérstök röð á galdrastafaefninu fyrr en kemur að verndargöldrum. Loks eru í bókinni stefnur og særingar eins og fylgdu oft handritum af þessu tagi.

Síðara handritið, Lbs 764 8vo, er af allt öðru sauðahúsi. Það telur 14 blöð, 14 x 8,5 cm að stærð og talið skrifað um 1820. Utan um handritið er gamalt seðlaveski úr leðri, bryddað með grænu og með taubandi til að vefja utan um það. Innan á fyrsta blaðið er nafnið Kristján Sigurðsson en engar vísbendingar um hver hann var. Landsbókasafnið keypti handritið árið 1903 af Þorláki V. Reykdal. Árið áður hafði Þorlákur selt Landsbókasafninu aðra bók sem nefnd hefur verið galdrabók, Lbs 977 4to. Lítið fer fyrir galdrastöfum í þeirri bók, en hún inniheldur nokkur innsigli, stefnur og rúnaletur, en einnig töfraráð eða konstir.

Í bókinni er að finna fjöldann allan af galdrastöfum sem hafa ekki birst fyrir almenningssjónum fyrr. Tvær galdraskræður telur 263 blaðsíður og er prentuð í kiljuformi. Fjórar litprentaðar síður af handritunum er að finna í bókinni.
 
Þjóðhátíðarsjóður og Menningarráð Vestfjarða styrktu útgáfuna.

Þessi frétt er afrituð lítið breytt af www.strandir.is.

Á Veitingastofunni Vegamót eru til sýnis myndir eftir listamenn úr Arnarfirði. Listamennirnir hafa gefið Foreldrafélagi Bíldudalsskóla myndirnar sem fjáröflun fyrir félagið. 28. júní næstkomandi verður listaverkauppboð í félagsheimilinu Baldurshaga kl. 15:00. Allur ágóði rennur til kaupa á útileiktækjum við grunnskólann. Upplýsingar um hvern listamann er að finna við myndirnar.

Eftirtaldir listamenn gefa myndir á uppboðið:

• Ingunn Jensdóttir
• Marsibil „Billa“ Kristjánsdóttir
• Ragnar Jónsson
• Freydís Kristjánsdóttir
• Hafliði Magnússon
• Óskar Magnússon
• Magnús Óskarsson
• Klara Berglind Hjálmarsdóttir
• Heiðbjört Tíbrá Kjartansdóttir
• Víkingur Gunnarsson
• Rósa Dögg Jónsdóttir

Þessi frétt er afrituð af www.patreksfjordur.is.

Tvær helgar í ágústmánuði munu átta myndlistarmenn setja upp jafnmargar sýningar í Reykhólahreppi og Dölum með nokkuð öðrum hætti en venjulegt er. Verkefnið er hugsað sem safn sýninga sem eiga sér stað á sama tíma á nokkrum stöðum frá Búðardal til Reykhóla og verður unnið út frá staðháttum og sögu svæðisins. Slíkt fyrirkomulag kallar á samvinnu við heimafólk í Reykhólahreppi og Dalasýslu enda er eitt af markmiðum verkefnisins „að efna til samtals milli listamanna og heimamanna", eins og segir í kynningu.

Listamennirnir átta eru Eric Hattan, Hildigunnur Birgisdóttir, Hreinn Friðfinnsson, Kristinn G. Harðarson, Magnús Pálsson, Sigurður Guðjónsson, Sólveig Aðalsteinsdóttir og Þóra Sigurðardóttir. Hugmyndin er að hvert þeirra velji sér sýningarstað eða svæði til þess að vinna með. Þar kemur til samstarfs og samtals við ábúendur eða forráðamenn viðkomandi staðar eða svæðis. Sýningarstaðurinn getur verið ákveðinn staður, húsarúst, hús í byggð, eyðibýli eða tiltekið svæði í sveitinni.

Það er því háð bæði verki og útfærslu viðkomandi listamanns og forráðamönnum staðarins hvernig því samstarfi yrði háttað. Sýningarnar verða einungis „opnar" tvær helgar í ágúst og landsvæðið sem þær virkja miðast við að hægt sé að fara á milli sýninganna á einum degi. Verkefnið er til þess ætlað að draga að gesti og leiða þá um sveitir Dalasýslu og Reykhólahrepps. Það ætti þannig að vera vel til þess fallið að vekja athygli á samspili menningar og náttúru á svæðinu - og á þeirri staðreynd, að við Breiðafjörð og í Dölum hafa margir listamenn sögu og samtíðar slitið bernskuskóm eða unnið lífsverk sitt.

Prentuð verða boðskort og auglýsing með korti af svæðinu og sýningarstaðir merkir þar inn. Sýningin verður auglýst í fjölmiðlum og á innri vef myndlistamanna auk þess sem vefur sýningarinnar verður tengdur við upplýsinga- og ferðavefi svæðisins.

Kveikjan að þessari hugmynd er löngun til að skapa tilefni til að dveljast og vinna úti á landi - sækja út fyrir hefðbundna sýningarsali, kynnast þessu landsvæði, sækja hugmyndir og vinna út frá náttúru og menningu landsins. Taka um leið þátt í mannlífi héraðanna, efna til samstarfs við heimamenn og að draga sýningargesti í ferðalag um þetta fallega svæði.

Verkefnið Hólar og Dalir nýtur stuðnings Menningarráðs Vestfjarða og Menningarráðs Vesturlands. Í forsvari fyrir listahópinn er Sólveig Aðalsteinsdóttir, sími 551 1949 og 692 1194.

Þessi frétt er afrituð lítið breytt af vefnum www.reykholar.is.

Búningar og barnagull nefnist sýning sem Þjóðbúningafélag Vestfjarða stendur að í samvinnu við Byggðasafn Vestfjarða og söfnin í Safnahúsinu á Ísafirði. Sýningin opnar þann 14. júní klukkan 13:00 og verður opin frá 13:00-16:00 á opnunardaginn, og eftir það á á opnunartíma Safnahússins. Á sýningunni Búningar og barnagull verða gamlir og nýir þjóðbúningar í eigu Byggðasafnsins og einstaklinga. Sérstök áhersla verður lögð á að sýna búninga barna og unglinga, auk gamalla leikfanga og annars sem tengist þjóðbúningum.

Á opnun sýningarinnar verða konur úr Þjóðbúningafélagi Vestfjarða íklæddar þjóðbúningum sem þær hafa verið að sauma undan farin ár undir handleiðslu Þjóðbúningastofu og Heimilisiðnaðarfélags Íslands. Allir sem eiga þjóðbúning eru hvattir til að mæta í honum á opnun sýningarinnar, hvort sem þau eru í félaginu eða ekki, til að gera sýninguna meira lifandi og skemmtilega.

Sýningin Búningar og barnagull er styrkt af Menningarráði Vestfjarða.

Fréttin er afrituð lítið breytt af fréttavefnum www.skutull.is.

Á næstu vikum standa Impra á Nýsköpunarmiðstöð og Ferðamálastofa fyrir vinnufundum til að kynna nýtt verkefni í menningartengdri ferðaþjónustu. Verður vinnufundur á Ísafirði þann 16. júní kl. 9:30-12:30. Verkefnið hefur fengið nafnið Gáttir – þróunarverkefni í menningartengdri ferðaþjónustu. Um er að ræða verkefni á vegum Iðnaðarráðuneytis unnið af Impru á Nýsköpunarmiðstöð og Ferðamálastofu í samvinnu við Háskólann á Hólum.

Þróunarverkefni þau sem hér um ræðir eru á sviði vöruþróunar í ferðaþjónustu; þeim er einkum ætlað að búa til nýja kosti sem haft geta áhrif á ferðatilhögun eða dvalarlengd ferðamanna en einnig að svara eftirspurn sem þegar er til staðar og hefur ekki hingað til verið sinnt. Horft til þess annars vegar að efla þá menningartengdu ferðaþjónustu sem fyrir hendi er og hins vegar að því að kynna ný sóknarfæri til frekari uppbyggingar í héraði.

Tilgangur verkefnisins er að efla ferðaþjónustu með því að vinna úr svæðisbundnum menningarverðmætum, bæði í einstökum héruðum og á landsvísu. Ennfremur að efla skilning og samstarf milli héraða og innan héraðs á því að þróa vöru og þjónustu byggða á menningu og menningararfi landsbyggðarinnar. Ferðaþjónustufyrirtæki eða hópar fyrirtækja, sem taka þátt fá aðstoð við stjórnun vöruþróunarverkefnis í menningartengdri ferðaþjónustu. Með verkefninu er verið að auka þekkingu á gæðum og þróun nýrrar vöru og/eða þjónustu.

Um er að ræða 2ja ára stuðningsverkefni í vöruþróun menningartengdrar ferðaþjónustu. Með þessu verkefni er stefnt að því að auka framboð á arðbærri vöru/þjónustu í menningartengdri ferðaþjónustu og stuðla að faglegum lausnum við vöruþróun í greininni. Gert er ráð fyrir að um nokkurs konar klasasamstarf fyrirtækja verði að ræða ýmist svæðisbundið samstarf eða samstarf á landsvísu á faglegum grundvelli.

Vinnufundur verður á Hótel Ísafirði mánudaginn 16. júní kl. 9:30-12:30. Frekari upplýsingar veita: Sigríður Ó. Kristjánsdóttir verkefnastjóri hjá Impru á Nýsköpunarmiðstöð í síma 450-4050 netfang: sirry@nmi.is eða Alda Þrastardóttir, verkefnastjóri hjá Ferðamálastofu í síma 464-9990, netfang: alda@icetourist.is. Einnig á vefjunum www.nmi.is og www.ferdamalastofa.is.