Menningarráð Vestfjarða / Fréttir

mánudagurinn 2. júní 2008

Popparar flytja lög við ljóð Steins

Ferð án fyrirheits er yfirskrift tónleika sem verða í Edinborgarhúsinu á miðvikudagskvöld. Nafnið er sótt í eina af ljóðabókum Steins Steinarr, en í ár eru liðin 100 ár frá fæðingu hans. Söngvararnir KK, Ellen Kristjánsdóttir, Þorsteinn Einarsson, Hildur Vala og Svavar Knútur munu flytja lög sem samin hafa verið við kvæði skáldsins. Umsjón með tónleikunum hefur Jón Ólafsson tónlistarmaður en hann hefur í félagi við Sigurð Bjólu samið ný lög við kvæði Steins og verða þau frumflutt á þessum tónleikum. „Það verður spennandi að heyra hvað samstarf þeirra félaga getur af sér. Mörg þekkt lög hafa orðið til við kvæði Steins í gegnum tíðina og má þar nefna Barn, Ræfilskvæði, Verkamaður, Það vex eitt blóm fyrir vestan og Hudson Bay sem dæmi. Eitthvað þessara laga verða vafalítið á dagskránni á þessum tónleikum“, segir á vef Edinborgarhússins.

Söngvurunum til fulltingis verður hljómsveit skipuð þeim Jóni Ólafssyni, Guðmundi Péturssyni, Helga Svavari Helgasyni, Valdimari Kolbeini Sigurjónssyni, Hrafnkeli Orra Egilssyni og Unu Sveinbjarnardóttur.

Jón Ólafsson hefur gengið með hugmyndina að þessum tónleikum í nokkur ár og með góðri liðveislu hefur hugmyndin nú orðið að veruleika. Hann er einn fjölmargra íslenskra lagahöfunda sem hafa gert lög við kvæði Steins Steinarr og sennilega er lag hans við Passíusálm no. 51 hvað þekktast „Skyldi manninum ekki leiðast að láta krossfesta sig?“.

Jón hefur komið víða við á löngum ferli sem tónlistarmaður. Hann hefur leikið á píanó frá blautu barnsbeini og verið afkastamikill lagahöfundur, útsetjari, flytjandi og upptökustjóri á íslenskum plötum síðustu 20 árin. Hann hefur komið að tónlist í fjölda leiksýninga, ýmist sem tónskáld eða tónlistarstjóri, auk þess að semja tónlist fyrir sjónvarp og kvikmyndir. Fyrir þremur árum gaf hann út sína fyrstu sólóplötu og síðan þá hefur önnur bæst í safnið. Jón hefur einnig stýrt tónlistarþáttum í sjónvarpi við miklar vinsældir.

Fréttin er afrituð af vefnum www.bb.is. Menningarráð Vestfjarða styrkir tónleikana Ferð án fyrirheits á Ísafirði.

Bein tilvísun

mánudagurinn 2. júní 2008

Byggðasafn Vestfjarða opnað

Formlega opnun Byggðasafns Vestfjarða þetta sumarið var um helgina. Starfsemi safnsins í sumar verður með hefðbundnum hætti og að vanda verður þurrkaður saltfiskur á reitum þess. Einnig verður boðið upp á siglingar á Pollinum á vélbátnum Gesti frá Vigur.

Á fimmtudag var opnuð sýning á harmonikkusafni Ásgeirs S. Sigurðssonar í Turnhúsinu, samhliða því að Ásgeir afhenti Byggðasafni Vestfjarða harmonikkusafn sitt til varðveislu. Verður sýningin opin á opnunartíma safnsins í sumar. Þar verða sýndar nokkrar harmonikkur úr safni Ásgeirs og í sumar mun Ásgeir vera á staðnum eftir atvikum og gera við harmonikkur á verkstæði sínu sem einnig hefur verið sett upp í Turnhúsinu. Þeir sem yndi hafa af harmonikkuleik geta fengið að grípa í hljóðfæri sem verður til taks ef menn finna hjá sér löngun til að taka lagið.

Vill Byggðasafnið hvetja bæjarbúa og nærsveitarmenn til að líta við í Neðstakaupstað um helgina og heimsækja safnið.

Opnunartímar í sumar eru sem hér segir:

Virka daga:
Júní kl. 10-17
Júlí kl. 10-18
Ágúst kl. 10-17

Um helgar:
Júní kl. 13-17
Júlí – ágúst kl. 10-17

Bein tilvísun

fimmtudagurinn 29. maí 2008

Sjóræningjahúsið á Patreksfirði opnar sýningu um sjórán

Hlíf Gylfadóttir, mannfræðingur, flytur léttan og skemmtilegan fyrirlestur um hjátrú sjómanna í Sjóræningjahúsinu á Patreksfirði á föstudaginn 30. maí, en föstudagurinn er jafnframt opnunardagur kaffihússins. Í kaffihúsinu er að finna inngang að sýningu Sjóræningjahússins, en aðalsýningin verður opnuð á næsta ári.

Dúettin Hljómur kemur til með að halda uppi feikna fjöri á föstudagskvöld í tilefni opnunar og er öllum boðið að fagna þessum áfanga. Alda Davíðsdóttir og Davíð Rúnar Gunnarsson, eigendur og rekstraraðilar, eru að von himinlifandi yfir því að rekstrarleyfi hafi fengist fyrir Sjómannadagshelgina. Alda sagði í samtali við fréttamann: ,,Það verður feikna fjör hjá okkur um helgina og vonumst til að sjá sem flesta". ,,Við erum afar þakklát fyrir þá aðstoð sem bæjarbúar hafa veitt okkur," bætti hún við.

Frétt afrituð lítið breytt af fréttavefnum www.patreksfjordur.is.

Bein tilvísun

mánudagurinn 26. maí 2008

Fjöllistavika Hafstrauma

Þriðja árið í röð standa félagasamtökin Hafstraumar fyrir viðburðum á sunnanverðum Vestfjörðum í kring um sjómannadaginn. Sú nýbreytni er þó á Hafstraumum 2008 að í stað einna tónleika á Patreksfirði teygja Hafstraumar úr sér fram í vikuna og yfir í næstu byggðalög. Þriðjudaginn 27. maí byrjar fjöllistavika Hafstrauma 2008 og verður boðið upp á ýmsa viðburði og verða þeir allir gestum og gangandi að kostnaðarlausu. Meðal viðburða má nefna, tvær leiksýningar, fernir tónleikar, þar af einir stórtónleikar þar sem 9 hljómsveitir koma fram og listasmiðju sem verður staðsett í gamla sláturhúsinu á Patreksfirði.

Ætlun Hafstrauma er að byggja upp öflugt menningarstarf á Vestfjörðum og er fjöllistavikan fyrsti þátturinn í því starfi.

Áætlað er að mikill fjöldi fólks leggi leið sína vestur á firði þessa daga en auk fjöllistaviku Hafstrauma fara fram mikil hátíðahöld á Patreksfirði í tengslum við sjómannadaginn. Eins og margir vita hefur sjómannadeginum verið fagnað með einstæðum hætti á Patreksfirði um árabil og að jafnaði er um fjögurra daga hátíðarhöld að ræða.

Bein tilvísun

þriðjudagurinn 20. maí 2008

Vestfirskar listakonur á heimaslóð

Sigrún Pálmadóttir óperusöngkona og Anna Áslaug Ragnarsdóttir píanóleikari halda tónleika í Hömrum 17 á sunnudag. Á efnisskránni eru norrænir ljóðasöngvar eftir Grieg. Sibelius, Rangström og Stenhammar. Tónleikarnir eru fjórðu og síðustu áskriftartónleikar Tónlistarfélags Ísafjarðar á yfirstandandi starfsári. Áskriftarkort gilda, en einnig verður hægt að kaupa miða við innganginn. Sigrún og Anna Áslaug eru báðar að vestan en hefur vegnað vel í tónlistarbransanum bæði hér heima sem og erlendis.

Sigrún Pálmadóttir er fædd og uppalin í Bolungarvík. Hún hóf söngnám við Tónlistarskólann á Akureyri hjá Hólmfríði Benediktsdóttur og stundaði síðan nám í Söngskólanum í Reykjavík hjá Ólöfu Kolbrúnu Harðardóttur og lauk þaðan burtfararprófi árið 1999. Sigrún stundaði nám við óperudeild Tónlistarháskólans í Stuttgart hjá prófessor Dunja Vejzovie og í ljóðadeild sama skóla hjá prófessor Richter frá 1999-2001. Sama ár og hún lauk námi var hún fastráðin við Óperuhúsið í Bonn. Sigrún hefur sótt ýmsa masterklassa, m.a. hjá André Orlowitz, Emmu Kirkby og Anthony Rooley. Hér á landi hefur hún sungið á Vínartónleikum með Sinfóníuhljómsveit Íslands og erlendis hefur hún haldið fjölda tónleika, aðallega í Þýskalandi. Sigrún hlaut verðlaun frá styrktarfélagi Óperunnar í Bonn árið 2004 fyrir velunnin störf og framfarir og hélt af því tilefni tónleika með hörpuleikaranum Jane Berthe. Hlutverk hennar á sviði eru orðin fjölmörg og má þar nefna Næturdrottninguna í Töfraflautunni, Frasquitu í Carmen, Norinu í Don Pasquale, Clorindu í Öskubusku, Olympíu í Ævintýrum Hoffmanns, Zerbinettu í Ariadne á Naxos, Víólettu í La traviata, Sophie í Rósariddaranum og í fyrra titilhlutverkið í í óperunnni Luciu di Lammermoor Nýverið söng hún hlutverk Víólettu í La Traviata í Íslensku óperunni.

Anna Áslaug Ragnarsdóttir hóf tónlistarnám sitt við Tónlistarskóla Ísafjarðar og nam síðar við Tónlistarskólann í Reykjavík. Að loknu einleikaraprófi þar fór hún til framhaldsnáms til Bretlands, Ítalíu og Þýskalands. Anna Áslaug hefur komið fram sem píanóleikari í ýmsum löndum Evrópu og Ameríku. Á Íslandi hefur hún oft leikið með Sinfóníuhljómsveit Íslands, haldið einleikstónleika víðs vegar um landið. Hún hefur leikið inn á upptökur fyrir Ríkisútvarpið og Sjónvarpið og Íslensk Tónverkamiðstöð hefur gefið út hljómplötu þar sem hún leikur verk íslenskra höfunda. Á síðari árum hefur hún einnig verið meðleikari með ljóðasöng og kammertónlist.

Fréttin er afrituð óbreytt af fréttavefnum www.bb.is.

Bein tilvísun