Byggðasafn Vestfjarða - ljósm. Sögusmiðjan

Byggðasafn Vestfjarða er eitt af þremur söfnum á landinu sem eru tilnefnd til íslensku safnaverðlaunanna árið 2008. Þetta var tilkynnt á alþjóðlega safnadeginum þann 18. maí. Auk Byggðasafns Vestfjarða á Ísafirði voru Minjasafnið á Akureyri og Safnasafnið í Svalbarðsströnd tilnefnd að þessu sinni. Íslensku safnaverðlaunin verða afhent á íslenska safnadeginum þann 13. júlí.

Það er Félag íslenskra safna og safnmanna ásamt Íslandsdeild ICOM (alþjóðaráði safna) sem standa saman að verðlaununum sem veitt eru annað hvert ár safni sem þykir skara fram úr. Safnaverðlaunin voru fyrst veitt Síldarminjasafninu á Siglufirði fyrir átta árum og eru veitt sjötta sinni í ár. Kallað var eftir ábendingum frá almenningi í ár og bárust yfir sextíu hugmyndir að tilnefningum og voru söfnin þrjú valin þar úr.

Í tilnefningu segir að Byggðasafn Vestfjarða á Ísafirði sé einstakt safn í sinni röð. Það leggi m.a. áherslu á að safna bátum og bátavélum og hafi umsjón með elsta slipp landsins. Minjasafnið á Akureyri sé eitt öflugasta byggðasafn landsins og í góðum tengslum við umhverfi sitt, standi fyrir metnaðarfullum sýningum í Laufási, Kirkjuhvoli á Akureyri, Nonnahúsi og víðar og hafi þeir sem að því standa virkjað almenning til samvinnu til að viðhalda þekkingu eldri kynslóða. Í Safnasafninu á Svalbarðsströnd fer fram ástríðufull söfnun á alþýðulistaverkum, að mati dómnefndar, sem stuðlar að varðveislu menningararfs sem annars hefði getað farið forgörðum. Auk þess er þar að finna safn nútímalistaverka og verk eftir samtímalistamenn. 

Þessi frétt er afrituð af fréttavefnum www.skutull.is og breytt lítillega.

Vortónleikar og danssýningar nemenda Listaskóla Rögnvaldar Ólafssonar á Ísafirði hefjast í dag. Kl. 17:00 verður fyrri sýning dansnemenda en í kvöld kl. 20:00 fara fram tónleikar gítar- og trommunemenda. Á morgun verður svo seinni sýning dansnemenda og hefst hún kl. 17:00. Á miðvikudag kl. 20:00 verða tónleikar píanónemenda.

Listaskóli Rögnvaldar Ólafssonar er í eigu tveggja stærstu hluthafa Edinborgarhússins efh., Litla leikklúbbsins og Myndlistarfélagsins á Ísafirði, auk Tónlistarskóla Margrétar Gunnarsdóttur. Skólinn var stofnaður árið 1993 og er uppbygging hans miðuð við að veita almenna fræðslu á sviði myndlistar, leiklistar, tónlistar og danslistar. Listaskólinn býður bæði nám samkvæmt fastri stundaskrá og einstök námskeið.

Þetta kemur fram á www.bb.is.

Sönghópur Félags eldri borgara í Skagafirði heimsækir Strandir og Vestfirði um næstu helgi. Kórinn syngur í Hólmavíkurkirkju á laugardag kl. 14 og í Ísafjarðarkirkju á sunnudag kl. 16. Söngstjóri og undirleikari er Jóhanna Marín Óskarsdóttir og Þorbergur Skagfjörð Jósepsson syngur einsöng. Þetta í fyrsta sinn sem kórinn heimsækir Vestfirði. Kórinn skipa rúmlega 50 manns en 40 kórfélegar koma vestur.

Þetta kemur fram á www.bb.is.

Vortónleikar tónlistarnema verða í útibúum Tónlistarskóla Ísafjarðar á Flateyri og Suðureyri í kvöld og á Þingeyri á morgun. Tónleikarnir á Flateyri verða í mötuneyti Eyrarodda og hefjast kl. 18. Þar verður leikið á píanó, gítar og trommur auk söngatriða. Þá munu grunnskólanemar á Flateyri sýna dans undir stjórn Evu Friðþjófsdóttur. Tónlistarkennarar við útibúið eru þau Bryndís Gunnarsdóttir, Þröstur Jóhannesson og Önundur Pálsson, en umsjón með útibúinu hefur Hulda Bragadóttir. Tónleikarnir á Suðureyri verða í Bjarnaborg og hefjast kl. 20. Þar verður fjölbreytt dagskrá, einleikur og samleikur á ýmis hljóðfæri í umsjón Lech Szyszko.

Vortónleikar tónlistarnema á Þingeyri fara fram í félagsheimili þorpsins kl. 17 á morgun. Þar annast tónlistarhjónin Krista og Raivo Sildoja fjölbreytta tónlistardagskrá. Á fyrri hluta tónleikanna verður einleikur tónlistarnema en síðari hlutinn er helgaður samleik af ýmsu tagi.

Þetta kemur fram á www.bb.is.

Mikil spenna er fyrir frumsýningu Forleiks á veitingastaðnum Við Pollinn á Ísafirði í kvöld en sýndir verða fjórir einleikir áhugaleikara. „Þetta leggst rosa vel í okkur og það er mikil spenna í gangi“, sagði Marta Sif Ólafsdóttir, ein leikaranna þegar blaðamaður náði á hana rétt áður en hún fór á generalprufu í gær. Auk hennar flytja Marsibil Kristjánsdóttir, Ingi Árnason og Sveinbjörn Hjálmarsson fjóra íslenska einleiki. Þeir eru: Súsan baðar sig, Munir og minjar, Það kostar ekkert að tala í GSM hjá guði og Örvænting. Sýningin er hugsuð sem forleikur fyrir einleikjahátíðina Act alone sem fer fram í fimmta sinn dagana 2.-6. júlí á Ísafirði.

Aðstandendur sýningarinnar notuðu fremur nýstárlega leið til að auglýsa Forleik en birt var kynningarmyndband á veraldarvefnum, svipað því sem tíðkast með kvikmyndir áður en þær koma í bíóhús. „Við höfum fengið mjög góð viðbrögð við myndbandinu og fólk virðist hafa gaman af þessu“, segir Marta.

Kómedíuleikarinn og framkvæmdastjóri Act alone Elfar Logi Hannesson leikstýrir en um er að ræða samstarfsverkefni Kómedíuleikhússins og Litla leikklúbbsins á Ísafirði. Enn eru lausir miðar á frumsýninguna en hægt er að panta þá með því að senda tölvupóst á komedia@komedia.is eða hringja í síma 897-2020.

Næstu sýningar verða dagana 18. og 23. maí á veitingastaðnum Við Pollinn, 6. júní í Kjallaranum í Bolungarvík og 7. júní í Vagninum á Flateyri. Sýningarnar hefjast kl. 21 og miðinn kostar 1.500 krónur.

Þessi frétt er afrituð óbreytt af fréttavefnum www.bb.is.