Hvítasunnuhelgina 9.-12. maí verður Skjaldborg – hátíð íslenkra heimildamynda haldin í annað sinn á Patreksfirði. Auk þess að frumsýna nýjar íslenskar heimildamyndir er hátíðinni ætlað að vera vettvangur fyrir kvikmyndagerðarfólk og áhugamenn um heimildamyndir til að hittast og skiptast á skoðunum. Í lok hátíðarinnar verður besta heimildamyndin á Skjaldborg 2008 valin af áhorfendum.

Dagskrá Skjaldborgar08 hefur verið læst enda komast ekki fleiri myndir fyrir á sýningardögum hátíðarinnar. Á Skjaldborg í ár verður sýnd 31 íslensk heimildamynd ásamt fjórum myndum Albert Maysles. Það vekur athygli hversu margar myndanna í þessu glæsilega úrvali tengjast tónlist. Þar má nefna tvær myndir um Mínus, nýja mynd um Sigur Rós, verk í vinnslu um Sigríði Níelsdóttur, myndir um Jórunni Viðar og DJ Platurn ásamt költklassík um Rolling Stones.

Í öðrum myndum hátíðarinnar er farið vítt og breitt um heiminn og koma margar áhugaverðar persónur við sögu. Má þar nefna karlstripparann Charlie, kverúlanta í heita pottinum, götubörn í Rússlandi, kaupmanninn á horninu, tölvuleikjafíkla og þónokkra hressa Vestfirðinga. Stysta mynd hátíðarinnar er þrjár mínútur en sú lengsta er um 100 mínútur.

Frá þessu segir á vef hátíðarinnar á vefslóðinni www.skjaldborgfilmfest.com.

Tónlistin og söngurinn eflir sálina

Glæsileg kaka fyrir viðstadda

Skrifað undir stofnfundargerðina

« 1 af 3 »

Sá gleðilegi atburður varð 1. maí á suðursvæði Vestfjarðakjálkans að stofnaður var karlakór á vestasta odda Evrópu, á Bjargtöngum við Látrabjarg. Kórinn heitir Karlakórinn Vestri. Að formlegri athöfn lokinni á Bjargtöngum söng kórinn eitt lag. Vestri, útgerðarfélag á Patreksfirði, bauð síðan öllum viðstöddum til kaffisamsætis í Breiðavík eftir stofnfundinn. Allir eru kórfélagar af suðursvæði Vestfjarðakjálkans og voru fimmtán skráðir stofnfélagar. Fyrstu stjórn kórsins skipa Guðmundur V. Magnússon formaður Bíldudal, Ólafur Gestur Rafnsson gjaldkeri Patreksfirði og Torfi Steinsson ritari Stóra-Krossholti.
 
Æfingar hafa verið haldnar einu sinni í viku að undanförnu. Síðasta æfing kórsins fyrir sumarfrí verður á mánudaginn kemur. Meining kórfélaga er að byrja starfið aftur af fullum krafti í september komandi haust og er það von kórfélaga að fleiri bætist í hópinn.

Portret af Steini Steinarr - Marsibil G. Kristjánsdóttir

Búlúlala – Öldin hans Steins er nýtt leikverk fyrir leikara og tónlistarmann sem Kómedíuleikhúsið setur á svið til að minnast aldarafmælis Steins Steinars. Leikurinn verður frumsýndur fimmtudaginn 8. maí í Tjöruhúsinu á Ísafirði. Alls verða þrjár sýningar á Ísafirði og eftir það verður flakkað um Vestfirðina og sýnt á Flateyri og Bíldudal, í Bolungarvík og Haukadal í Dýrafirði. Einnig hefur leikhúsinu verið boðið að sýna leikinn á sérstakri Steins Steinars hátíð á Snjáfjallasetri í Dalbæ á Snæfjallaströnd 21. júní næstkomandi.

Í þessum nýja ljóðaleik, Búlúlala – Öldin hans Steins, eru flutt mörg af þekktustu ljóðum Steins í bland við minna þekkt kvæði. Leikurinn er sambland leikara og tónlistarmanns og er í raun framhald af samstarfi þeirra Elfars Loga Hannessonar leikara og Þrastar Jóhannessonar tónlistarmanns sem hófst í fyrra með ljóðaleiknum Ég bið að heilsa. Í þessum nýja ljóðaleik flytur Elfar Logi  ljóð Steins í leik og tali en Þröstur flytur frumsamin lög við ljóð Steins Steinars. Til samstarfs hafa þeir fengið þriðja listamanninn sem er Marsibil G. Kristjánsdóttir sem hefur gert portretmynd af skáldinu sem gegnir hlutverki leikmyndar í sýningunni.

Eins og margir vita hefur Steinn verið vinsælt myndefni margra myndlistarmanna í gegnum árin og er gaman að fá nú á aldarafmæli Steins nýja mynd af skáldinu eftir vestfirskan listamann. Meðal ljóða sem koma við sögu í Búlúlala – Öldin hans Steins má nefna Að frelsa heiminn, Barn, Miðvikudagur, Söngvarinn, Tindátarnir, Þjóðin og ég og að sjálfsögðu ljóðið Búlúlala sem leikurinn er nefndur eftir.

Steinn Steinarr er án efa eitt þekktasta og jafnframt umdeildasta ljóðskáld síðustu aldar. Hann hét réttu nafni Aðalsteinn Kristmundsson og fæddist 13. október árið 1908 á Laugalandi í Nauteyrarhreppi. Þegar Steinn kom fram á ritvöllinn hóf hann þegar að brjóta reglur sem ríkt höfðu í skáldskap hér á landi um langa hríð og varð umdeildur fyrir vikið. Harðorðar greinar birtust í blöðum um Stein og margir sögðu skáldskap hans vera vitleysu eina. Aðrir á hinn bóginn fögnuðu framlagi hans og sögðu að loksins væri komið fram skáld sem þyrði að breyta staðnaðri, íslenskri ljóðlist. Ljóð Steins eru þjóðinni mjög kær og við mörg þeirra hafa verið samin lög sem hafa ekki síður notið vinsælda. Steinn Steinarr andaðist 25. maí árið 1958, rétt tæplega fimmtíu ára að aldri.

Kómedíuleikhúsið er á netinu og er slóðin www.komedia.is. Miðapantanir fara fram á vef leikhússins.

Leikari: Elfar Logi Hannesson
Tónlistarmaður: Þröstur Jóhannesson
Leikmynd: Marsibil G. Kristjánsdóttir

Fimmta Act alone hátíðin verður haldin á Ísafirði 2.-6. júlí næstkomandi og er aðgangur að hátíðinni ókeypis. Það er Kómedíuleikhúsið sem stendur fyrir leiklistarhátíðinni sem er eina árlega leiklistarhátíðin á Íslandi. Hátíðin er helguð einleikjum og hefur vakið mikla athygli bæði hér heima og erlendis. Til gamans má geta þess að fyrr á árinu fékk Act alone Menningarverðlaun DV. Nánari upplýsingar um Act alone er á heimasíðu hátíðarinnar www.actalone.net.

Kómedíuleikhúsið á Ísafirði var stofnað árið 1997 og er fyrsta og eina atvinnuleikhúsið á Vestfjörðum. Meðal leikverka sem leikhúsið hefur sett á svið má nefna Muggur (2002), Steinn Steinarr (2003), Gísli Súrsson (2005), Dimmalimm (2006) og Jólasveinar Grýlusynir (2007).