Patreksfjörður - ljósm. Sögusmiðjan

Gamla smiðjan á Vatneyri tekur örum breytingum þessa dagana. Um páskana var unnið við málningarvinnu og hönnun fyrsta hluta sýningar um sjórán og sjóræningja við Vestfirðir ásamt útileiksvæði fyrir börn á öllum aldri vel á veg komin. Þegar blaðamann Tíðis bar að garði voru nokkur sæskrímsli nýfarin en þau brugðu sér í bíltúr frá Bíldudal þar sem einnig var unnið að sýningargerð um páskana.

Komandi helgi verður líf og fjör í smiðjunni en blásið hefur verið til vinnuhelgar dagana 29. og 30. mars. Þónokkrir sjóræningjavinir hafa boðað komu sína og eru allir velkomnir, hvort sem þeir vilja taka til hendinni eða bara reka inn nefið til að skoða.

Sjóræningjar á Patreksfirði hafa einnig opnað heimasíðu. Hún er ennþá í vinnslu en í byrjun verður samt sem áður hægt að fylgjast með fréttum. Slóðin er www.sjoraeningjahusid.is.

Þessi frétt er afrituð af fréttavefnum Tíðis á slóðinni www.patreskfjordur.is og birt hér lítið breytt.

Allsérstök myndlista- og ljósmyndasýning stendur nú yfir í í veitingasal Hamraborgar á Ísafirði. Það er Dýrfinna Torfadóttir gullsmiður sem á verkin á sýningunni, en ljósmyndirnar Árný Herbertsdóttir atvinnuljósmyndari.

Ljósmyndirnar eru af starfsfólki Landsbankans á Ísafirði prentaðar á striga, við hlið hverrar myndar er lágmynd sem Dýrfinna hefur gert og er úr nýsilfri, sem og silfri, blaðgulli, kopar, messing og svo stálþráðum.

Tileinkar Dýrfinna sýninguna starfsfólki bankans með þökk fyrir ánægluleg kynni og góða þjónustu í áranna rás og segir í fréttatilkuynningu að kveikjan hafi verið daglegar heimsóknir hennar í bankann, meðan hún bjó á Ísafirði. Þá var ekki til heimabanki og posar voru ekki komnir til sögunnar og því voru hin mannlegu beinu tengsl forsenda allra viðskipta. Bankinn ásamt Póshúsinu hafi verið hennar afdrep í erli dagsins. Og það hafi teygst úr banka- og pósthúsferðum því oft hafi verið staldrað við á Silfurtorgi og spjallað við mann og annan. Heitir sýningin Fyrir tíma posa og heimabanka.

Þessi frétt var flutt í Svæðisútvarpi Vestfjarða - www.ruv.is.

Hugmynd er uppi um að stofnað verði sérstakt safn eða menningarsetur um Stein Steinarr, á Nauteyri í Ísafjarðardjúpi. Sveitarstjórn Strandabyggðar, tók jákvætt í erindi áhugamanna um Steinshús, um að láta eftir eignarhluta sveitarfélagsins í félagsheimilinu á Nauteyri, sem varð illa úti í bruna fyrir nokkrum árum og hefur staðið ónotað síðan.

Þórarinn Magnússon ættaður frá Ytra Ósi í Steingrímsfirði, einn áhugamanna, segir tímabært að heiðra minningu Aðalsteins Kristmundssonar eða Steins Steinars sem fæddist og ólst upp fyrstu árin á Laugalandi í Skjaldfannadal við Djúp. Steinn fæddist 1908 og lést 1958.

Þetta kom fram í Svæðisútvarpi Vestfjarða og er afritað af www.ruv.is og birt lítið breytt.