Allsérstök myndlista- og ljósmyndasýning stendur nú yfir í í veitingasal Hamraborgar á Ísafirði. Það er Dýrfinna Torfadóttir gullsmiður sem á verkin á sýningunni, en ljósmyndirnar Árný Herbertsdóttir atvinnuljósmyndari.

Ljósmyndirnar eru af starfsfólki Landsbankans á Ísafirði prentaðar á striga, við hlið hverrar myndar er lágmynd sem Dýrfinna hefur gert og er úr nýsilfri, sem og silfri, blaðgulli, kopar, messing og svo stálþráðum.

Tileinkar Dýrfinna sýninguna starfsfólki bankans með þökk fyrir ánægluleg kynni og góða þjónustu í áranna rás og segir í fréttatilkuynningu að kveikjan hafi verið daglegar heimsóknir hennar í bankann, meðan hún bjó á Ísafirði. Þá var ekki til heimabanki og posar voru ekki komnir til sögunnar og því voru hin mannlegu beinu tengsl forsenda allra viðskipta. Bankinn ásamt Póshúsinu hafi verið hennar afdrep í erli dagsins. Og það hafi teygst úr banka- og pósthúsferðum því oft hafi verið staldrað við á Silfurtorgi og spjallað við mann og annan. Heitir sýningin Fyrir tíma posa og heimabanka.

Þessi frétt var flutt í Svæðisútvarpi Vestfjarða - www.ruv.is.

Hugmynd er uppi um að stofnað verði sérstakt safn eða menningarsetur um Stein Steinarr, á Nauteyri í Ísafjarðardjúpi. Sveitarstjórn Strandabyggðar, tók jákvætt í erindi áhugamanna um Steinshús, um að láta eftir eignarhluta sveitarfélagsins í félagsheimilinu á Nauteyri, sem varð illa úti í bruna fyrir nokkrum árum og hefur staðið ónotað síðan.

Þórarinn Magnússon ættaður frá Ytra Ósi í Steingrímsfirði, einn áhugamanna, segir tímabært að heiðra minningu Aðalsteins Kristmundssonar eða Steins Steinars sem fæddist og ólst upp fyrstu árin á Laugalandi í Skjaldfannadal við Djúp. Steinn fæddist 1908 og lést 1958.

Þetta kom fram í Svæðisútvarpi Vestfjarða og er afritað af www.ruv.is og birt lítið breytt.

Frá tónleikunum - ljósm. www.tonis.is

Það ríkti sannkölluð hátíðarstemmning á fjölsóttum páskatónleikum Tónlistarskóla Ísafjarðar sem haldnir voru í Ísafjarðarkirkju síðdegis á föstudaginn langa undir yfirskriftinni Heimsins ljós. Hátt á annað hundrað áheyrendur sóttu tónleikana og ljóst að þeir kunnu vel að meta þetta framtak.

Á tónleikunum komu fram strengjasveit, einleikarar, sönghópar og upplesarar, alls um 25 manns og fluttu valda þætti úr meistaraverki Bachs, Jóhannesarpassíunni. Það var pólski fiðluleikarinn Janusz Frach, serm átti hugmyndina að þessum óvenjulegu tónleikum, valdi þætti úr passíunni, útsetti, æfði verkið og stjórnaði flutningnum. Markmiðið var að kynna Vestfirðingum eitt af merkustu verkum tónbókmenntanna og veita kennurum og nemendum tækifæri til að taka þátt í flutningi þeirra auk þess að að bjóða heimafólki og gestum Skíðavikunnar upp á að hlýða á tónlist sem fjallar um boðskap páskahátíðarinnar. Þá voru tónleikarnir liður í afmælishaldi Tónlistarskóla Ísafjarðar sem fagnar 60 ára afmæli á þessu ári.

Kammersveitina skipuðu nokkrir nemendur og kennarar Tónlistarskóla Ísafjarðar ásamt framhaldsnemum úr Listaháskóla Íslands og víðar sem tengjast Vestfjörðum á einn eða annan hátt.. Hljóðfæraleikararnir eru Janusz Frach, Maksymilian Frach, Geirþrúður Guðjónsdóttir og Halldór Sveinsson á fiðlu, Bjarni Frímann Bjarnason á víólu, Þorbjörg Daphne Hall á selló og Iwona Frach á orgel. Nokkrir stuttir einleikskaflar voru í höndum Arnþrúðar Gísladóttur á þverflautu, Madis Mäekalle á kornett og Þrastar Jóhannessonar á gítar. Sönghóparnir eru tveir, annar þeirra var að mestu skipaður ungum söngnemum og kórstúlkum sem stunda söng- eða hljóðfæranám við Tónlistarskóla Ísafjarðar en í hinum hópnum voru nokkrir ungir drengir, sem einnig stunda nám við skólann.

Upplesturinn skipaði stóran sess í flutningnum.  Pétur Markan guðfræðinemi las texta guðspjallamannsins, en Þórunn Arna Kristjánsdóttir leiklistarnemi og söngkona flutti aðra texta, ljóð, hugleiðingar og útlegging á söguþræðinum. Í Jóhannesarpassíunni er rakin píslarsaga Jesú Krists eins og hún kemur fyrir í Jóhannesarguðspjalli Nýja testamentisins. Óhætt er að fullyrða að flytjendum á tónleikunum hafi tekist að koma þessari dramatísku sögu til skila til áheyrenda á áhrifamikinn hátt, því að flutningurinn tókst með miklum ágætum, hvort sem um var að ræða söng, hljóðfæraleik eða upplestur. Hrifning og gleði ríkti meðal áheyrenda að loknum tónleikunum enda var allur heildarsvipur þeirra með geðþekkum og hátíðlegum brag, sem bar vitni ást og virðingu flytjendanna á viðfangsefnunum.

Fréttatilkynning frá Tónlistarskóla Ísafjarðar - www.tonis.is.