Menningarráð Vestfjarða / Fréttir

föstudagurinn 14. mars 2008

Heiðin frumsýnd í dag

Kvikmyndin Heiðin eftir Einar Þór Gunnlaugsson frá Hvilft í Önundarfirði verður frumsýnd í Háskólabíói í kvöld. Myndin var tekin upp á sunnanverðum Vestfjörðum í vor, að mestu í Reykhólasveit. Myndin er íslensk/ensk samframleiðsla og styrkt af Kvikmyndamiðstöð Íslands. Hún skartar hópi glæsilegra íslenskra leikara af yngri og eldri kynslóðinni, og söngkonan Hafdís Huld hefur sungið sérstaklega fyrir myndina mexíkóskt þjóðlag sem tekið var upp í Bretlandi í apríl sl. Þess má geta að á meðal leikara er vestfirski kómedíuleikarinn Elfar Logi Hannesson.

Sagan, sem fjallar um mann sem beðinn er um að fara með kjörkassa út á flugvöll en missir af flugvélinni, er í léttum dúr og gerist í nútímanum. Kostnaður myndarinnar er hóflegur og telst undir meðaltali sé miðar við íslenkar kvikmyndaframleiðslur. Verkefnið er tveggja landa samstarf Íslands og Bretlands, en leikstjórinn Einar Þór hefur m.a. komist að samkomulagi við EMI Music Publishing í London um úfgáfu kvikmyndtónlistar myndarinnar.

Þessi frétt er afrituð af www.bb.is.

Bein tilvísun

föstudagurinn 14. mars 2008

Dýrin í Hálsaskógi frumsýnd

Ljósm. strandir.is

Í kvöld föstudagskvöldið 14. mars kl. 19:00 verður söng- og barnaleikritið Dýrin í Hálsaskógi frumsýnt á Hólmavík. Leikritið er samvinnuverkefni Grunnskólans og Tónskólans á Hólmavík og Leikfélags Hólmavíkur og hafa stífar æfingar staðið yfir síðustu vikur undir stjórn Hrafnhildar Guðbjörnsdóttur og Bjarna Ómars Haraldssonar. Önnur sýning er á morgun laugardag kl. 15:00 og þriðja sýning í Króksfjarðarnesi á sunnudag kl. 17:00. Leikhópurinn sem samanstendur bæði af unglingum og fullorðnum leikurum vonast eftir að sem allra flestir mæti til að sjá afrakstur erfiðisins. Alls hafa 52 einstaklingar unnið að uppsetningunni sem fékk styrk frá Menningarráði Vestfjarða.

Bein tilvísun

föstudagurinn 14. mars 2008

Handverkssýning í Drymlu

Á morgun, laugardaginn 15. mars kl. 14:00 verður opnuð sýning á munum og fatnaði úr þæfðri ull eftir Bolvíkinginn og ráðherrafrúnna Oddnýu Jóhannsdóttur í handverkshúsinu Drymlu í Bolungarvík og stendur sýningin til kl. 17.00. Bæjarbúar og nærsveitamenn eru hvattir til að kíkja við og skoða handverkið og fá sér rjúkandi kaffibolla í leiðinni. Drymla er vel þekkt fyrir fjölbreytilegt handverk og vel unna vöru enda eru félagar í handverkshópnum afar hugmyndaríkir og vandvirkir.

Í Dymbilviku verður opið í Drymlu sem hér segir: Mánudag, þriðjudag og miðvikudag frá kl. 14.00 - 18.00 og ætíð er sopinn heitur á könnunni.

Frétt afrituð af www.vikari.is.

Bein tilvísun

sunnudagurinn 9. mars 2008

Minnt á umsóknarfrest - 14. mars

Menningarráð Vestfjarða minnir á að frestur til að skila styrkumsóknum vegna fyrri úthlutunar ráðsins til menningarverkefna árið 2008, er til föstudagsins 14. mars næstkomandi. Í desember á síðasta ári úthlutaði Menningarráðið styrkjum í fyrsta sinn og fengu þá 52 vestfirsk menningarverkefni fjárhagsstuðning til ýmissa góðra verka. Umsækjendur geta verið einstaklingar, félagasamtök, fyrirtæki, stofnanir og sveitarfélög á Vestfjörðum.

Við fyrri úthlutun 2008 hefur Menningarráð Vestfjarða ákveðið að litið verði sérstaklega til menningarverkefna sem fela í sér eftirtaldar áherslur:
   a. Nýsköpun á sviði lista og menningarstarfs.
   b. Verkefni sem miða að fjölgun starfa.
   c. Samstarf milli menningarstofnanna, byggðarlaga eða listgreina og uppsetning viðburða á fleiri en einum stað.
   d. Verkefni sem stuðla að þátttöku barna, unglinga og eldri borgara í listsköpun og menningarstarfi.
   e. Verkefni sem stuðla að eflingu fagþekkingar á sviði menningar og lista.

Hér á vef Menningarráðs Vestfjarða á slóðinni www.vestfirskmenning.is er að finna allar nánari upplýsingar um verkefnastyrkina, úthlutunarreglur 2008 og yfirlit yfir síðustu úthlutun og eru umsækjendur beðnir um að kynna sér þessar upplýsingar. Þar er einnig að finna rafrænt umsóknarform til að senda umsóknir til ráðsins, en umsókn þarf að innihalda greinargóða lýsingu á verkefnum með verkáætlun, tímasetningum og áætlun um kostnað og gjöld. Á vef Menningarráðsins eru einnig margvíslegar upplýsingar um menningarlíf á Vestfjörðum og starfsemi Menningarráðsins, fréttir af atburðum og tíðindi úr menningarlífinu.

Nánari upplýsingar veitir Jón Jónsson, menningarfulltrúi Vestfjarða, í síma 891-7372 eða netfanginu menning@vestfirdir.is. Menningarfulltrúi gefur þeim sem eftir því leita ráð við gerð styrkumsókna til Menningarráðsins eða í aðra sjóði.

Bein tilvísun

fimmtudagurinn 6. mars 2008

Elfar Logi fékk Menningarverðlaun DV

Elfar Logi í hlutverki Gísla Súrssonar

Það var gleðidagur í herbúðum Kómedíuleikhússins í gær, miðvikudaginn 5. mars, þegar Menningarverðlaun DV voru afhent. Kómedíuleikarinn, Elfar Logi Hannesson, var tilnefndur til Menningarverðlauna DV í flokki leiklistar eins og áður hefur komið fram. Var hann tilnefndur fyrir leiklistarhátíðina Act alone á Ísafirði sem hefur verið haldin síðan 2004 og er enn í dag eina árlega leiklistarhátíðin á Íslandi.

Á vefnum www.komedia.is segir: "Mikið þótti Kómedíu nú vænt um þessa tilnefningu frá DV fólkinu enda eru þessi Menningarverðlaun söguleg og stórmerkilegt framtak hjá dagblaðinu. Menningarverðlaun DV voru kunngerð á Hótel Borg og hlaut Kómedíuleikarinn sérstök Netverðlaun Menningarverðlauna DV. En lesendum dv.is var boðið uppá að kjósa sitt uppáhald af þeim fjölda listamanna sem tilnefndir voru. Það verður að viðurkennast að sá Kómíski átti alls ekki von á þessu og var nærri búinn að missa Sprite glasið sem hann hélt á í hendinni í gólfið svo mikið varð honum um þegar verðlaunin voru tilkynnt. Vá, maður segir nú bara ekki meira. Að finna svona stuðning frá fólkinu í landinu er alveg ómetanlegt. Act alone er greinilega hátíð fólksins og ljóst að margir fíla það í botn sem þar hefur verið gert. Kómedíuleikhúsið þakkar ykkur öllum og hlakkar til að sjá ykkur á Act alone í sumar dagna 2. - 6. júlí. Þið eruð best."

Bein tilvísun