Ein af myndum Sigurgeirs

Sunnudaginn 2. mars kl 14:00 verður opnuð ljósmyndasýningin "Alþýðulistamaðurinn Sigurgeir Bjarni Halldórsson" í Safnahúsinu á Ísafirði, gamla sjúkrahúsinu. Markmið með sýningu þessari er að heiðra minningu Sigurgeirs og þá list sem að hann stundaði í sínum frístundum. Segja má að list hans sé tvíþætt: Annarsvegar ljósmyndun og hins vegar málun ljósmyndanna. En hann gerði mikið að því að mála svart/hvítar myndir sínar sem urðu að litmyndum þess tíma.

Ljósmyndirnar eru teknar um og eftir 1940. Allstaðar þar sem að Sigurgeirs fór um hvort sem var til sjós eða lands fylgdi myndavélin með og þar sem að hann var sjómaður var mikið af myndefni hans skip ásamt fjölda sjávarplássa víðsvegar um landið. Ísafjörður var honum einnig hugleikin og er til mikið af myndum sem teknar eru yfir bæinn úr fjallshlíðunum í kring.

Safn hans sem telur um 900 myndir hefur nú verið sett í tölvutækt form og mun safnið í heild sinni verða sett inn á vef Ljósmyndasafns Ísafjarðar. Þar verður opnað aðgengi að myndum hans þann 2. mars nk.  á sama tíma og opnun sýningarinnar.

Aðstandendur Sigurgeirs  munu afhenda Ljósmyndasafni Ísafjarðar safn mynda hans til varðveislu í tilefni af 100 fæðingarafmæli hans 2. mars 2008.

Vestfirskur fálki

Menningarsjóður Íslands og Finnlands hefur óskað eftir styrkumsóknum. Tilgangur sjóðsins er að efla menningartengsl Finnlands og Íslands. Í því skyni veitir sjóðurinn árlega ferðastyrki og annan fjárstuðning. Styrkir verða öðru fremur veittir einstaklingum en stuðningur við samtök og stofnanir kemur einnig til greina. Styrkir til að sækja norrænar eða alþjóðlegar ráðstefnur koma að jafnaði ekki til greina.

Umsóknir um styrki úr sjóðnum fyrir tímabilið 1. júní 2008 - 31. maí 2009 skulu berast sjóðsstjórninni Hanaholmen - kulturcentrum för Sverige og Finland, FI-021000 Esbo, Finland, í síðasta lagi 14. mars 2008. Ákvörðun um úthlutun úr sjóðnum verður tekin fyrir lok maí nk.

Æskilegt er að umsóknir séu ritaðar á sænsku, dönsku eða norsku. Sérstök umsóknareyðublöð fást í menntamálaráðuneytinu, Sölvhólsgötu 4, 150 Reykjavík. Einnig er unnt að nálgast eyðublöðin á vef Hanaholmen.
Stjórn Menningarsjóðs Íslands og Finnlands, 26. febrúar 2008.

Undirbúningur Bryggjuhátíðar á Drangsnesi - ljósm. Jenný Jensdóttir

Í fréttatilkynningu frá Iðnaðarráðherra kemur fram að ráðuneytið hefur ákveðið að ráðstafa 100 milljónum króna af fé Byggðaáætlunar 2007–2009 til þriggja þróunarverkefna í ferðaþjónustu. Í öllum tilfellum verður auglýst eftir hópum fyrirtækja og einstaklinga í ferðaþjónustu sem vilja taka þátt í þróunarverkefnum á skilgreindum svæðum. Verkefnin snúa að þremur sviðum; í fyrsta lagi þróun í menningartengdri ferðaþjónustu; í öðru lagi auknun gæðum og vöruþróun í ferðaþjónustu og í þriðja lagi að matföngum úr héraði og áframhaldandi þróun viðfangsefnisins “Beint frá býli”.

Ferðamálastofa mun hafa umsjón með þróunarverkefnunum í samvinnu við IMPRU á Nýsköpunarmiðstöð Íslands. Framkvæmd og útfærsla verður í höndum framangreindra stofnana en af hálfu ráðuneytisins hefur verið lögð áhersla á eftirtalin atriði:

Þróun í menningartengdri ferðaþjónustu.

Markmið þessa verkefnis er að skilgreina sóknarfæri ákveðinna landssvæða og styðja þau í stefnumótun í menningartengdri ferðaþjónustu. Um verður að ræða greiningarvinnu með sérfræðingum á sviði menningar, lista, viðburða og markaðsmála á sérkennum og tækifærum viðkomandi svæðis, auk aðstoðar við vöru- og þjónustuþróun.

Aukin gæði í ferðaþjónustu.

Markmiðið á þessu sviði er að auka þekkingu á þjónustuþróun og bæta gæði þjónustu og vöru sem leitt geti til aukinnar arðsemi. Stefnt er að því að samræmd gæðaflokkun og merki verði innleiddí ferðaþjónustu. Um verður að tefla bæði faglega og fjárhagslega aðstoð til þess að innleiða þjónustuþróun og gæðakerfi.

Matur úr héraði.

Markmiðið með “Mat úr héraði” er að efla sérkenni íslenskrar ferðaþjónustu með auknum tengslum við hefðbundna matargerð. Byggt verður á verkefninu "Beint frá býli", sem stuðlaði að framleiðslu matvæla á sveitabýlum og milliliðalausri sölu þeirra til neytenda. Að verkefninu hafa m.a. staðið Háskólinn á Hólum, Lifandi landbúnaður, Félag ferðaþjónustubænda, Landbúnaðarháskóli Íslands, Bændasamtök Íslands og Impra á Nýsköpunarstöð Íslands.

Næstu skref eru að mynda samstarfshóp væntanlegra framleiðenda, samtaka í ferðaþjónustu, og fulltrúa úr stoðkerfi atvinnu- og iðnþróunar til að vinna að því að þroska enn frekar hugmyndir um framleiðslu og sölu beint frá býli. Verkefninu er ætlað að ná yfir þriggja ára tímabil 2008, 2009 og 2010.

Á bókasafni á Hólmavík - ljósm. Sögusmiðjan

Kynningarnefnd bókasafna efnir til samkeppni um slagorð til að nota í kynningarátaki fyrir bókasöfn. Slagorðið þarf að eiga við allar tegundir bókasafna, hvort sem um er að ræða almenningsbókasöfn, skólabókasöfn eða sérfræðisöfn. Því er ætlað að koma jákvæðum skilaboðum á framfæri um bókasöfn og þarf að vera stutt, grípandi og gott að muna. Veggspjald og kynningu á keppninni er hægt að nálgast á vefsíðunni www.bokasafn.is. 

Frestur til að skila inn hugmyndum er til 20. mars 2008. Upplýsing, félag bókasafns- og upplýsingafræða veitir 100.000 króna verðlaun fyrir besta slagorðið. Verðlaunin verða veitt á degi bókarinnar, þann 23. apríl.
 
Sendið hugmyndir í tölvupósti á bokasafn@bokasafn.is eða merkt "verðlaunasamkeppni" á: Bæjarbókasafn Ölfuss, Hafnarbergi 1, 815 Þorlákshöfn.

Ómar Smári

Listamaðurinn góðkunni, Ómar Smári Kristinsson, mun halda sýningu í Einarshúsi á laugardaginn 1. mars nk. og hefst sýningin kl. 15:00. Á sýningunni verða 24 blýantsteikningar af Bolungarvík. Helmingur myndanna er unnin eftir gömlum ljósmyndum og hinn helmingurinn útfrá ljósmyndum sem teknar voru árið 2007. Sjónarhorn nýju myndanna er það sama og þeirra gömlu. Þannig er í rauninni um 12 pör mynda að ræða, þar sem hægt er að virða fyrir sér hvað breyst hefur í gegnum tíðina.

Til að ljá sögunni meiri dýpt, þá verður á sýningunni lesefni sem Lárus Benediktsson tók saman um gömlu myndirnar. Það var einnig hann sem lagði teiknaranum þær til. Helmingur teikninganna (6 pör) kom út á Bolungarvíkurdagatali fyrir árið 2008. Hinn helmingurinn kemur út ári síðar. Mun Ómar Smári verða á staðnum til kl. 18:00 á laugardag og heitt kaffi verður á könnunni fyrir listunnendur til að dreypa á og hægt verður að virða myndirnar fyrir sér allan marsmánuð og njóta verka Ómars Smára.