Þróunarsetrið á Hólmavík

Föstudaginn 1. apríl  verður opið hús milli kl. 15:00 og 17:00 í Þróunarsetrinu á Hólmavík, að Höfðagötu 3. Boðið verður upp á kaffisopa og vöfflur fyrir gesti og gangandi og starfsmenn segja frá starfsemi sinna stofnanna og fyrirtækja. Ekki er langt síðan sveitarfélagið Strandabyggð flutti höfuðstöðvar sínar í húsið og rekur nú öfluga starfsemi á miðhæðinni. Auk þess eru Menningarráð Vestfjarða, Náttúrustofa Vestfjarða, Atvinnuþróunarfélag Vestfjarða, Fræðslumiðstöð Vestfjarða, Verkalýðsfélag Vestfirðinga og Þjóðfræðistofa með skrifstofuaðstöðu í Þróunarsetrinu. Allir sem áhuga hafa eru hvattir til að líta við og kynna sér starfsemina og hina nýju aðstöðu Strandabyggðar. 

Bókmenntasjóður auglýsir eftir umsóknum um Nýræktarstyrki en næsti umsóknarfrestur fyrir þessa styrki rennur út miðvikudaginn 6. apríl 2011.

Nýræktarstyrkir Bókmenntasjóðs eru sérstakir styrkir til útgáfu á nýjum íslenskum skáldskap. Eru styrkirnir ætlaðir til að styðja við útgáfu á fyrstu verkum nýrra höfunda, verkum sem hafa takmarkaða eða litla tekjuvon, en hafa ótvírætt menningarlegt gildi. Hér falla undir skáldverk í víðri merkingu þess orðs, til dæmis sögur, ljóð, barnaefni, leikrit eða eitthvað allt annað, og leitast er eftir breidd og fjölbreytni í umsóknum. Umsóknareyðublöð eru aðgengileg á vefsíðu Bókmenntasjóðs, www.bok.is. Umsóknum skal skilað á skrifstofu Bókmenntasjóðs, Austurstræti 18, 101 Reykjavík. Frekari upplýsingar fást á netfanginu bok@bok.is og í síma 552 8500.

Hlutverk Bókmenntasjóðs er að efla íslenskar bókmenntir og bókaútgáfu. Bókmenntasjóður styrkir meðal annars útgáfu frumsaminna verka og þýðingar bókmennta á íslensku, en stuðlar einnig að kynningu íslenskra bókmennta heima og erlendis og sinnir öðrum verkefnum sem falla undir verksvið sjóðsins.

Framundan er málstofa á Hugvísindaþingi þann 25. mars þar sem fjallað verður um tengsl akademíu og menningartengdrar ferðaþjónustu. Hún verður haldin í aðalbyggingu Háskóla Íslands, stofu 220 og hefst kl. 13.00. Markmið málstofunnar er að kalla á umræðu um það hver aðkoma hugvísindaakademíunnar geti verið og skuli vera að ferðaþjónustu, sem á örskömmum tíma er orðin ein af aðalatvinnugreinum landsins. Unnið er markvisst að uppbyggingu greinarinnar og framundan blasir enn við aukning að því marki sem valda mun róttækum breytingum á íslensku samfélagi.

Sjónum verður beint að menningartengdri ferðaþjónustu, fagþekkingu hugvísinda á því sviði og stefnu, eða stefnuleysi, þeirra sem að uppbyggingunni standa. Stefnt er að því að umræða málstofunnar snúist meðal annars um hvernig þekking þeirra sem hafa menntað sig á sviði hug- og mannvísinda geti nýst til þess að auka gæði fyrirtækja og verkefna og um leið bætt atvinnumöguleika menntaðs fólks í hinni nýju atvinnugrein.
 
Fyrirlestar:

Lára Magnúsardóttir, forstöðumaður Rannsókna- og fræðaseturs HÍ á Norðurlandi vestra: Þegar menning er atvinnulíf
Áki G. Karlsson, þjóðfræðingur: Hagnýt(t) og ónýt(t) fræði: Hvernig þjóðfræðin bjó til menningartengda ferðaþjónustu á Íslandi
Katrín Jakobsdóttir, íslenskufræðingur og mennta- og menningarmálaráðherra: Menning og atvinna - andstæður eða samstæður?
Uggi Ævarsson, minjavörður Suðurlands: Menningarminjar og menningartengd ferðaþjónusta
Jón Jónsson, menningarfulltrúi Vestfjarða: Rótað í framtíðinni: Gæðaþróun og samvinna
Sólveig Ólafsdóttir, framkvæmdastjóri ReykjavíkurAkademíunnar: Friðargæslusveit UNESCO og upphefðin að utan

Málstofustjóri: Valdimar Tryggvi Hafstein, dósent í þjóðfræði
 

Nú í vetur stendur Fræðslumiðstöð Vestfjarða í samstarfi við Fornleifastofnun Íslands, Vestfirði á miðöldum og Minjavörð Vestfjarða fyrir röð fyrirlestra undir heitinu Menningararfurinn. Fimmtudaginn 17. mars er komið að næsta fyrirlestri. Þá mun Jón Jónsson menningarfulltrúi Vestfjarða fjalla um um hvernig þjóðmenning og saga hefur með fjölbreyttum hætti verið nýtt við atvinnusköpun á Vestfjörðum. Um leið verður skoðað hvaða áhrif slík notkun á menningararfi svæðisins hefur á ímynd þess út á við og sjálfsmynd íbúanna. Skyggnst verður inn í framtíðina og rætt um möguleika á fjölgun skapandi starfa og frekari uppbyggingu á þessu sviði. 

Jón verður á Hólmavík og fyrirlesturinn sendur í gegnum fjarfundabúnað til Ísafjarðar og Patreksfjarðar. Hægt er að mæta á fjarfund á þessum stöðum eða í Þróunarsetrið á Hólmavík. Fyrirlesturinn hefst kl. 17:00 og stendur í um eina klukkustund. Þátttökugjald er 1.000 kr. Allar frekari upplýsingar og skráning á www.frmst.is  og í síma: 456-5025.  

Menningarráð Vestfjarða auglýsir eftir umsóknum um styrki til menningarverkefna á grundvelli samnings mennta- og menningarmálaráðuneytis og iðnaðarráðuneytis við Fjórðungssamband Vestfirðinga. Tilgangur styrkjanna er að efla menningarstarfsemi og menningartengda ferðaþjónustu á Vestfjörðum.
 
Áherslur við fyrri úthlutun 2011
Hægt er að sækja um stuðning við hverskyns menningarverkefni, svo framarlega að umsókn eða verkefni stangist ekki á við úthlutunarreglur sem samþykktar eru við hverja úthlutun. Menningarráð Vestfjarða hefur ákveðið að við fyrri úthlutun ársins 2011 verði horft sérstaklega til verkefna sem uppfylla eitt eða fleiri eftirtalinna atriða: 

# Verkefni sem efla samstarf á sviði menningarmála á Vestfjörðum.

# Verkefni sem stuðla að nýsköpun og fjölbreytni í menningartengdum verkefnum.

# Verkefni sem fjölga atvinnutækifærum á sviði menningar.

# Menningarstarfsemi sem styður við ferðaþjónustu.

# Verkefni sem stuðla að þátttöku barna og unglinga í listsköpun og menningarstarfi.

  
Umsóknarfrestur er til og með fimmtudeginum 14. apríl. Úthlutun fer fram í maí. Fyrirvari er gerður um undirritun nýs menningarsamnings milli ríkisvaldins og Fjórðungssambands Vestfirðinga fyrir þann tíma.
 
Umsóknum skal skilað til Menningarráðs Vestfjarða á viðeigandi eyðublöðum eða í gegnum umsóknarform hér á vefnum undir tenglinum Styrkir. Umsækjendur eru eindregið hvattir til að kynna sér úthlutunarreglur Menningarráðs á sama stað.
 
Allar nánari upplýsingar veitir Jón Jónsson menningarfulltrúi Vestfjarða í síma 891-7372 eða í netfanginu menning@vestfirdir.is.