Fimmtudaginn 24. janúar nk. heldur Sinfóníuhljómsveit Íslands tónleika á Ísafirði. Langt er um liðið síðan hljómsveitin spilaði síðast á Vestfjörðum, en tilefnið að þessu sinni er 60 ára afmæli Tónlistarskólans á Ísafirði og Tónlistarfélags Ísafjarðar, en tónlistarlíf er sem kunnugt er afar blómlegt á Ísafirði og nágrenni. Það sést best á því hvað þátttaka heimamanna er mikil á tónleikunum. Anna Áslaug Ragnarsdóttir leikur einleik í píanókonserti eftir Chopin, hátíðarkór Tónlistarskólans flytur Gloriu Poulencs með hljómsveitinni og nýtt verk, sinfonietta eftir Jónas Tómasson, verður á efnisskránni.

Á efnisskránni eru verk eftir Shostakovitsj, Chopin, Poulenc og heimamanninn Jónas Tómasson.
Hljómsveitarstjóri: Bernharður Wilkinson
Einleikari: Anna Áslaug Ragnarsdóttir
Kór: Hátíðarkór Tónlistarskóla Ísafjarðar
Einsöngur: Ingunn Ósk Sturludóttir
Kórstjóri: Beáta Joó

Höfundur - Verk
Dímítrí Sjovstakovtsj: Hátíðarforleikur
Francis Poulenc: Gloria
Frédéric Chopin: Píanókonsert nr. 2
Jónas Tómasson: Sinfóníetta

Tónleikarnir hefjast kl. 19:30 og eru haldnir í Íþróttahúsinu á Torfnesi. Miðaverð er 2.000 kr. Miðasala er hafin á síðunni www.sinfonia.is og einnig er hægt að hringja í síma 545 2500 og tryggja sér miða á þennan viðburð.
 

Leiklistarhátíðin Act alone á Ísafirði verður haldin dagana 2.-6. júlí í sumar og er þetta fimmta árið í röð sem hátíðin er haldin. Act alone er eina árlega leiklistarhátíðin á Íslandi og er aðgangur ókeypis, en sá háttur hefur verið hafður á frá upphafi. Það er Kómedíuleikhúsið á Ísafirði sem stendur fyrir Act alone og er Kómedíuleikarinn, Elfar Logi Hannesson, listrænn stjórnandi gleðinnar.

Undirbúningur fyrir Act alone 2008 er langt kominn og vinnur nú listrænn stjórnandi að mótun dagskrárinnar en enn er þó hægt að bæta við nokkrum sýningum og einleiknum listauppákomum. Þeir sem hafa áhuga á að koma með einleik eða einleikna uppákomu á Act alone 2008 eru beðnir um að setja sig í samband við hátíðarhaldara á netfangið komedia@komedia.is. 

Act alone hátíðin hefur stækkað ár frá ári í fyrra bættist t.d. myndlistin inn í dagskrána þegar boðið var uppá sýningu á verkum tveggja einfara í íslenskri myndlist. Í ár bætast tvær nýjar listgreinar inní Act alone flóruna það er dans og tónlist. Act alone er því ekki aðeins leiklistarhátíð heldur er hún nú orðin fjölbreytt listahátíð. Act alone hefur þegar sannað tilgang sinn og er í dag ein stærsta listahátíðin á landsbyggðinni. Þegar hafa verið bókaðar tvær einleiknar danssýningar og einnig verður boðið upp á einleik á fiðlu.

Fjölmargir íslenskir einleikir verða á dagskrá Act alone 2008 og alla vega tvær erlendar gestasýningar, þar á meðal er verðlaunasýning frá Búlgaríu sem nefnist Chick with a Trick. Nánari upplýsingar um Act alone eru á heimasíðu hátíðarinnar www.actalone.net.

Í fréttatilkynningu frá Höfuðborgarstofu er vakin athygli á spennandi ráðstefnu sem haldin verður í Reykjavík dagana 27. - 29. febrúar næstkomandi. Um er að ræða árlega ráðstefnu IFEA samtakanna - International Festivals and Events Association.

Samtökin voru stofnuð í Bandaríkjunum 1956 en hafa vaxið þannig að nú eru starfrækt sjálfstæð IFEA samtök í Evrópu, Ástralíu og víðar. Í samtökunum eru fulltrúar frá háskólum, borgum, sveitarfélögum og sjálfstæðum hátíðahöldurum. Samtökin halda stóra ráðstefnu á hverju ári, síðast í Aþenu, þar sem hugað er að ýmsum þáttum hátíða og menningarviðburða, dæmisögur sagðar og hátíðir kynntar.

Höfuðborgarstofa lagði inn umsókn fyrir tveim árum að ráðstefnan yrði haldin hér í Reykjavík í ár og stjórn samtakanna samþykkti það. Til Reykjavíkur eru því að koma u.þ.b. 200 þátttakendur sem allir vinna við viðburði og hátíðir af ýmsu tagi frá bæði Evrópu og Bandaríkjunum til að ræða um hátíðir og viðburði. Um leið gefst gestum tækifæri til að kynnast Reykjavík og því öfluga menningarstarfi sem þar þrífst.

Ráðstefnan hefur fengið yfirskriftina Nurturing Creativity: contrasts, challenge, change. Skráning fer fram á http://ifeaeurope.com/reykjavik/ og þar eru einnig nánari upplýsingar um ráðstefnuna.

Tónlistarhátíðin Aldrei fór ég suður sem haldin verður á Ísafirði um páskana fékk í gær afhenta Eyrarrósina 2008 við hátíðlega athöfn á Bessastöðum. Eyrarrósin eru helstu verðlaun sem afhent eru til menningarverkefna á landsbyggðinni og eru ár hvert veitt einu framúrskarandi verkefni. Fylgja peningaverðlaun að upphæð 1,5 milljónir. Önnur verkefni sem valin voru úr hóp umsækjenda um verðlaunin í hóp þriggja verkefna sem til greina komu að þessu sinni voru Safnasafnið í Eyjafirði og karlakórinn Heimir í Skagafirði.

Á síðasta ári fékk Strandagaldur Eyrarrósina 2007 fyrir Galdrasýningu á Ströndum og önnur verkefni, þannig að segja má að íbúar Vestfjarðakjálkans séu svo sannarlega framarlega á landsvísu á menningarsviðinu. Menningarráð Vestfjarða óskar aðstandendum Aldrei fór ég suður hjartanlega til hamingju með verðskulduð verðlaun. Verðlaunin eru rós í hnappagat menningarlífs á Vestfjörðum og það á svo sannarlega líka við um hátíðina sjálfa.