Menntamálaráðuneytið hefur auglýst eftir umsóknum um styrki úr Þróunarsjóði námsgagna og er hægt að nálgast allar frekari upplýsingar og umsóknareyðublað undir þessari slóð: menntamalaraduneyti.is/frettir/Auglysingar/allar/nr/4367. Nokkrar af þeim umsóknum sem bárust Menningarráði Vestfjarða fyrir fyrstu úthlutun 2007 snérust um námsgagnagerð og safnkennsluefni tengt menningararfinum, en fengu ekki stuðning að þessu sinni. Menningarfulltrúi hefur nú bent þessum umsækjendum á þann möguleika að sækja um styrk úr Þróunarsjóði námsgagna og annað vestfirskt skólafólk er einnig eindregið hvatt til þess að skoða þennan sjóð og sækja um stuðning við verkefni í hann.

Ríkisstjórnin hefur ákveðið að veita alls 160 milljónum króna til eflingar ferðaþjónustu á þeim svæðum sem verða fyrir aflasamdrætti vegna skerðingar á veiðiheimildum. Þetta kemur fram á vef Ferðamálastofu. Auglýst er eftir umsóknum um stuðning við verkefni til atvinnusköpunar í ferðaþjónustu á ofangreindum svæðum. Umsækjendur geta verið sveitarfélög, einstaklingar og fyrirtæki og er hámarksstyrkur til hvers verkefnis 8 milljónir kr. Menningarráð Vestfjarða hvetur þá sem standa fyrir viðamiklum menningar- og ferðaþjónustuverkefnum á Vestfjörðum eindregið til að sækja um stuðning.

Gert er ráð fyrir að verkefnin verði unnin á árunum 2008-2009 og verður styrkurinn greiddur í tvennu lagi, helmingur hvort ár. Seinni greiðslan er háð árangursmælingu í samræmi við ákvæði í umsókn, en hver umsækjandi gerir tillögu að árangursmælikvarða fyrir viðkomandi verkefni.

Við afgreiðslu umsókna verður sérstaklega litið til langtímaáhrifa verkefna á sköpun nýrra starfa á svæðunum og hversu hratt störfin geta orðið til. Ekki er um að ræða styrki til menntunar eða rannsókna. Umsóknum skal skila á sérstökum umsóknareyðublöðum, sem hægt er að nálgast á vef Ferðamálastofu.

Umsóknum skal skila til Byggðastofnunar, Ártorgi 1, 550 Sauðárkróki eða Ferðamálastofu, Lækjargötu 3, 101 Reykjavík fyrir 5. febrúar 2008.

Árið 2008 verða veittir úr Sænsk-íslenska samstarfssjóðnum nokkrir ferðastyrkir. Markmið sjóðsins er að stuðla að auknu samstarfi Svíþjóðar og Íslands á sviði vísinda, menntunar og menningar. Um styrki þessa skal sótt á sérstökum eyðublöðum sem fást í menntamálaráðuneytinu, Sölvhólsgötu 4, 150 Reykjavík og á skrifstofu Norræna félagsins í Stokkhólmi, Box 127 07, S-112 94 Stockholm.

Umsóknareyðublöð er einnig að finna á vefslóðinni norden.se. Umsóknir skulu sendar á skrifstofu Norræna félagsins í Stokkhólmi. Umsóknir skal stíla á stjórn Sænsk-íslenska samstarfssjóðsins/Svensk-isländska samarbetsfonden. Umsóknarfrestur er til 1. febrúar 2008. Styrkjunum verður úthlutað í mars.

Menningarverðlaunin Eyrarrósin sem er sérstök viðurkenning fyrir framúrskarandi menningarverkefni á landsbyggðinni, verður afhent í fjórða sinn á Bessastöðum fimmtudaginn 10. janúar n.k. Frá þessu segir á fréttavefnum www.strandir.is. Að venju hafa þrjú verkefni verið tilnefnd úr hópi umsækjenda og eitt þeirra hlýtur Eyrarrósina sem innifelur auk heiðursins fjárstyrk að upphæð kr. 1,5 milljón og verðlaunagrip eftir Steinunni Þórarinsdóttur til eignar. Hin tvö verkefnin hljóta síðan 200 þúsund króna framlag. Öll verkefnin hljóta að auki tíu flugferðir frá Flugfélagi Íslands. Strandagaldur hlaut Eyrarrósina á síðasta ári. Verkefnin sem eru tilnefnd að þessi sinni koma frá Ísafirði og úr Skagafirði, auk þess sem Safnasafnið í Eyjafirði er tilnefnt annað árið í röð.

Styrkjum Menningarráðs Vestfjarða fyrir árið 2007 var úthlutað við hátíðlega athöfn í Náttúrugripasafninu í Bolungarvík föstudaginn 7. desember 2007. Við athöfnina fluttu Gunnar Hallsson formaður Menningarráðs Vestfjarða og Eiríkur Þorláksson fulltrúi Menntamálaráðuneytisins erindi, en athöfninni stjórnaði Anna Guðrún Edvardsdóttir formaður Fjórðungssambands Vestfirðinga.

Jón Jónsson menningarfulltrúi Vestfjarða kynnti síðan niðurstöður Menningarráðsins varðandi styrkveitingar árið 2007 áður en boðið var upp á léttar veitingar. Menningaratriði voru auk þess á dagskránni, brot af því besta úr vestfirsku menningarlífi. Hægt er að nálgast yfirlit yfir þau verkefni sem fengu styrki hér á síðunni undir tenglinum Styrkir.