Menningarráð Vestfjarða / Fréttir

mánudagurinn 3. desember 2007

Menningarráð úthlutar styrkjum 2007 nk. föstudag

Menningarráð Vestfjarða hefur nú lokið yfirferð styrkumsókna og tekið ákvörðun um úthlutun á styrkjum Menningarráðs Vestfjarða fyrir árið 2007. Alls bárust 104 umsóknir um stuðning, samtals að upphæð rúmar 72,5 milljónir kr. Menningarráðið hefur nú samþykkt að veita styrki til 52 verkefna árið 2007, samtals að upphæð rúmar 20 milljónir.

Menningarfulltrúi Vestfjarða mun í dag og á morgun senda öllum umsækjendum svör með niðurstöðum varðandi umsóknir þeirra.

Næstkomandi föstudag, þann 7. desember kl. 14:00, mun Menningarráð Vestfjarða síðan úthluta verkefnastyrkjum vegna ársins 2007 við hátíðlega athöfn í Náttúrugripasafninu í Bolungarvík. Þess er eindregið vænst að fulltrúi eða fulltrúar styrkhafa mæti á úthlutunina, en láti vita í netfangið menning@vestfirdir.is ef enginn kemur fyrir þeirra hönd.

Bein tilvísun

föstudagurinn 30. nóvember 2007

Hljóðbók með þjóðsögum úr Ísafjarðarbæ

Kómedíuleikhúsið vinnur nú að útgáfu hljóðbókarinnar Þjóðsögur úr Ísafjarðarbæ og er hún væntanleg á markaðinn næstu daga. Ísafjarðarbær er mikið og stórt sagnasvæði sem nær allt frá Dýrafirði til Hornstranda. Á þessari hljóðbók eru 33 þjóðsögur sem er skipt niður í fimm flokka: Álfa- og huldufólkssögur, Draugasögur, Galdrasögur, Skrímslasögur og Tröllasögur. Sögurnar eru sóttar í hin ýmsu þjóðsagnasöfn einsog safn Jóns Árnasonar og Arngríms Fr. Bjarnasonar. Það er Kómedíuleikarinn sem flytur sögurnar. Hljóðbókin er nú í fjölföldun og ætti að vera komin á markaðinn í byrjun desember.

Þetta er önnur hljóðbókin sem Kómedíuleikhúsið gefur út en í vor sendi Kómedía frá sér bókina Þjóðsögur úr Vesturbyggð. Hljóðbækurnar fást í vefverslun Kómedíuleikhússins www.komedia.is og er þegar byrjað að taka við pöntunum á nýju hljóðbókinni, Þjóðsögur úr Ísafjarðarbæ. Einnig eru hljóðbækurnar til sölu á Hótel Ísafirði, í versluninni Orkustein á Ísafirði og Veitingastofunni Vegamót á Bíldudal.

Bein tilvísun

þriðjudagurinn 27. nóvember 2007

Frestur til að sækja um stuðning Húsafriðunarsjóðs að renna út

Frestur til að sækja um styrk í Húsafriðunarsjóð er að styttast, en hægt er að sækja um fram til 1. desember ár hvert. Úr Húsafriðunarsjóði eru veittir styrkir til margvíslegra verkefna sem tengjast ráðgjöf og áætlunargerð vegna viðhalds á friðuðum húsum og mannvirkjum og einnig til beinna viðhaldsverkefna. Þá er nefndinni heimilt að styrkja ráðgjöf og áætlunargerð vegna viðhalds á öðrum húsum og mannvirkjum en þeim sem eru friðuð, ef þau hafa menningarsögulegt eða listrænt gildi. Hið sama gildir um viðhaldið sjálft á slíkum mannvirkjum. Eins styrkir sjóðurinn gerð og útgáfu bæja- og húsakannana og aðrar byggingarsögulegar rannsóknir og útgáfu rita um þær. Umsóknareyðublað og leiðbeiningar finna menn á www.husafridun.is.

Bein tilvísun

þriðjudagurinn 20. nóvember 2007

Styrkir til atvinnumála kvenna

Vinnumálastofnun vekur athygli á að félagsmálaráðherra auglýsir aukaúthlutun á styrkjum til atvinnumála kvenna árið 2007. Styrkirnir eru ætlaðir konum sem eru með góða viðskiptahugmynd og stefna á að koma á fót sjálfstæðum atvinnurekstri.

Þessi aukaúthlutun hefur það meginmarkmið að styðja við viðskiptahugmyndir sem fjölga atvinnutækifærum á landsbyggðinni, en allar konur eiga þess kost að sækja um styrki. Umsóknareyðublað er rafrænt á heimasíðu Vinnumálastofnunar og er hægt að nálgast það undir þessum tengli. Áhugasömum konum er bent á að kynna sér reglur um úthlutunina á umsóknarsíðunni. Upplýsingar um styrkúthlutunina veitir Líney Árnadóttir í síma 582 4900 og á netfanginu liney.arnadottir@vmst.is. Umsóknarfrestur er til 10. desember.

Menningarráð Vestfjarða hvetur þær vestfirsku konur sem vinna að menningarverkefnum eða hafa hug á að skapa sér atvinnu á sviði menningar og lista til að sækja um styrki til þess úr þessum sjóði. Hámarksstyrkur er 1.500.000.- og miðast hámarkið einnig við að styrkir eru aldrei hærri en 50% af kostnaðaráætlun. Getur munað um minna við að koma starfsemi af stað.

Bein tilvísun

föstudagurinn 16. nóvember 2007

Nýtt íslenskt jólaleikrit frumsýnt á Ísafirði

Kómedíuleikhúsið á Ísafirði frumsýnir nýtt íslenskt jólaleikrit laugardaginn 17. nóvember í Tjöruhúsinu. Leikurinn heitir Jólasveinar Grýlusynir og er einleikur eins og flest verk Kómedíuleikhússins. Höfundar eru þau Elfar Logi Hannesson og Soffía Vagnsdóttur. Hér er á ferðinni leikur um gömlu íslensku jólasveinanna og reynt að svara ýmsum spurningum um þessa skrítnu sveina. Hvers vegna er Stúfur minnstur jólasveinanna? Af hverju er Stekkjastaur svona hár til hnésins? Var fjórtándi jólasveinninn til? Eru Askasleikir og Bjúgnakrækir tvíburar? Allt þetta og miklu fleira fáum við að vita í sýningunni um Grýlusynina.

Inn í ævintýrið fléttast allt annað ævintýri um unglingspilt sem er að leita að kúnni Búkollu sem hefur strokið enn einu sinni. Þessi fræga kú er einmitt þekkt fyrir þá áráttu sína að hlaupast á brott frá eigendum sínum. Leit piltsins að kúnni leiðir hann hátt upp í fjöll þar sem ýmsar furðuverur búa. Mikil tónlist er í sýningunni, en allir sveinarnir þrettán taka lagið.

Jólasveinar Grýlusynir verður á fjölunum í Tjöruhúsinu í Neðstakaupstað á Ísafirði og hefur það nú tekið á sig jólalega mynd og er sannkallað ævintýrahús jólasveinanna. Fjölmargir vestfirskir listamenn koma að sýningunni. Hönnuður jólasveinanna, sem eru bæði brúður og grímur, er Marsibil G. Kristjánsdóttir og hannar hún auk þess leikmynd í samstarfi við Kristján Gunnarsson. Leikari er Elfar Logi Hannesson, höfundur tónlistar er Hrólfur Vagnsson, búningahönnuður er Alda Veiga Sigurðardóttir, ljósahönnuður er Jóhann Daníel Daníelsson og Soffía Vagnsdóttir leikstýrir.

Jólaleikurinn Jólasveinar Grýlusynir verður sýndur allar helgar í nóvember og desember kl.14.00. Einnig verða sýningar milli jóla og nýárs. Kómedíuleikhúsið er fyrsta og eina atvinnuleikhúsið á Vestfjörðum og er heimasíða þess www.komedia.is.

Bein tilvísun