Í kvöld, miðvikudagskvöldið 2 .febrúar verða tónleikar í Hömrum undir yfirskriftinni „Eistneskt þjóðlagakvöld með myndaívafi". Á tónleikunum spila og syngja Leanne Barbo, Laura Barbo og Marju Varblane sem eru þessa dagana á kynnisferð um Ísland, en með þeim leika vinir þeirra, tónlistarhjónin Krista og Raivo Sildoja, sem búsett eru á Þingeyri. Leikið verður á ýmis þjóðarhljóðfæri Eistlendinga s.s. kannel, hiiu kannel. Torupill (sekkjapípa), parmupill (gyðingaharpa) og fiðlu. Þá verður myndum frá Eistlandi varpað á tjald. Tónleikarnir eru um klukkustund að lengd og aðgangseyririnn ( kr. 1.000 og kr 500 fyrir skólabörn) rennur í ferðasjóð tónlistarkvennanna.

Eistnesku tónlistarkonurnar Leanne Barbo og Marju Varblane hafa leikið þjóðlagatónlist og lagt stund á þjóðdansa síðustu 10 ár og nú eru þær á ferð um Ísland til að kynna sér íslenskar hefðir og jafnframt kynna hefðir sins lands. Þjóðlegur söngur, hljóðfæraleikur og dans eru afar ríkir þættir í eistneskri menningu og sjálfstæðisbarátta Eistlendinga á árunum 1987-1991 hefur oft verið kölluð „Byltingin syngjandi".

Vestfirska atvinnuleikhúsið Kómedíuleikhúsið frumsýnir föstudaginn 4. febrúar nýtt íslenskt leikverk er nefnist Vestfirskur skáldskapur á 57. mín og vestfirsk tónlist á 27. mín. Verkefnið er styrkt af Menningarráði Vestfjarða. Eins og nafnið gefur til kynna er vestfirskur skáldskapur eins og hann leggur til umfjöllunar og er af nægu að taka. Þó um háalvarlegar bókmenntir sé að ræða þá er um óvæntan gamanleik að ræða. Þegar er uppselt á frumsýningu en laus sæti á 2 sýningu laugardaginn 5. febrúar kl. 20. Næstu sýningar verða föstudaginn 11. og 12. febrúar einnig kl. 20. Síðsta sýningarhelgi sem fyrirhuguð er í Arnardal verður 17. og 18. febrúar. Miðasala á allar sýningar er hafin í síma 450 5565. Sýnt er í Arnardal.

Í kynningu á verkinu segir: Vestfirðingar hafa löngum verið þekktir hagyrðingar og sögumenn. Frásagnarlistin er þeim í blóð borin og að henda fram stöku er þeim jafn eðlislægt og að draga andann. Þau eru ófá þjóðskáldin og stórskáldin úr röðum Vestfirðinga í gegnum aldirnar ... Þeir félagar í Kómedíuleikhúsinu gera vestfirskum skáldskap skil ... svo að úr verður bráðfjörug og skemmtileg sýning, sneisafull af sprenghlægilegum uppákomum með tilvísanir í okkar þekktustu skáld.

Að skáldskapnum loknum verður farið í gegnum vestfirska tónlist á 27. mín. Eins og í skáldskapnum á tónlistin að vestan sér litríka sögu eða hver kannast ekki við BG og Ingibjörg, Facon, Ýr, Grafík, Mugison og þannig mætti lengi telja.

Leikarar og leikgerð: Ársæll Níelsson, Elfar Logi Hannesson
Tónlist: Guðmundur Hjaltason
Leikmynd/búningar/leikstjórn: Marsibil G. Kristjánsdóttir
 

Eins og undanfarin ár standa konum til boða sérstakir styrkir til uppbyggingar atvinnulífs. Þær konur sem standa fyrir vöruþróun eða hyggja á fyrirtækjarekstur á sviði menningar á Vestfjörðum eru eindregið hvattar til að skoða vandlega það stoðkerfi sem er til staðar. Umsóknarfrestur er að þessu sinni til miðnættis 7. febrúar og er sótt um á vefsíðunni www.atvinnumalkvenna.is. Á henni eru einnig margvíslegar aðrar upplýsingar sem koma öllum að notum sem hyggja á rekstur.

Menningarfulltrúar landshlutanna

Á mánudag funduðu menningarfulltrúar allra landshlutanna í Keflavík, en á Suðurnesjum hefur Björk Guðjónsdóttir verið ráðin menningarfulltrúi fyrir landshlutann. Fundurinn var afar gagnlegur, en á honum báru menn saman bækur sínar, fóru yfir verklag og vinnubrögð, auk þess sem nýr menningarsamningur landshlutasamtakanna við ríkið til þriggja ára var til umræðu.

Á þriðjudag var síðan fundur menningarfulltrúa ásamt formönnum menningarráðanna í Stofu Jóns Sigurðssonar í Þjóðmenningarhúsinu í Reykjavík.

Laugardaginn 29. janúar 2011 var efnt til málþings um ritskoðun og menningu í söfnum og sýningarrýmum og var það haldið á vegum Rannsóknaseturs í safnafræði við Háskóla Íslands. Nú er hægt að nálgast upptöku frá málþinginu um ritskoðun á slóðinni: http://vimeo.com/19455693

Efninu var þannig lýst í fréttatilkynningu:

"Opinber umræða um ritskoðun, þöggun og skoðanakúgun á Íslandi hefur verið í lágmarki. En nú eru aðrir tímar. Efnahagslegt hrun haustið 2008 varð til þess að farið var að ræða um endurreisn og endurmat af miklu kappi fyrir flest svið þjóðlífsins. En hvað um söfn og sýningarrými? Hver er að hugsa um endurreisn og endurmat í því samhengi? Eiga slík rými eitthvað erindi inn í umræður um ritskoðun, þöggun, skoðanakúgun, endurreisn og endurmat? Hvert er hlutverk safna í lýðræðislegri umræðu eða bælingu jafnvel þöggun skoðana? Hver er samfélagsleg skylda safna til að sporna við þöggun?

Er það hlutverk safna að vera siðgæðisvörður? Hvert er hlutverk listamanna, fræðimanna eða sýninga í að fjalla um ritskoðun, þöggun og skoðanakúgun? Er svigrúm fyrir þessa aðila til þess að taka slíkt til umfjöllunar? Til hvaða bragðs á að taka veki sýning hörð viðbrögð og "fari yfir strikið"? Hvað er þetta "strik" og hver býr það til? Hvert er hlutverk opinberra aðila í slíkum aðstæðum? En fjölmiðla? En menntamanna? Hversu langt á að ganga í málamiðlun sýnenda, sýningastjóra, stjórnenda, gesta safna og sýningarrýma? Hvert er hlutverk gesta í að veita söfnum, sýningum, sýnendum og jafnvel öðrum gestum aðhald?

Þátttakendur í pallborði voru:
Steinunn Gunnlaugsdóttir, listamaður
Birta Guðjónsdóttir, safnstjóri og listamaður
Hannes Lárusson, listamaður
Haukur Már Helgason, heimspekingur
Birna Kristjánsdóttir, sérfræðingur
Jón Ólafsson, heimspekingur
Ólöf K. Sigurðardóttir, safnstjóri

Stjórnandi var Hjálmar Sveinsson.